‘ଅଗ୍ନିପଥ’ ବିବାଦ; ପ୍ରତିରକ୍ଷା ମନ୍ତ୍ରୀଙ୍କ ଅଧ୍ୟକ୍ଷତାରେ ୩ ସେନାର ମୁଖ୍ୟଙ୍କ ସହ ବସିଛି ବୈଠକ

ନୂଆଦିଲ୍ଳୀ: ଦେଶରେ ବଢ଼ୁଛି ‘ଅଗ୍ନିପଥ’ ବିବାଦ । ‘ଅଗ୍ନିପଥ’ ବିବାଦକୁ ନେଇ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ଏକ ବୈଠକ ଡକାଇଛନ୍ତି । ରାଜନାଥ ସିଂହଙ୍କ ଅଧ୍ୟକ୍ଷତାରେ ତାଙ୍କ ଦିଲ୍ଲୀ ସ୍ଥିତ ବାସଭବନରେ ଏକ ଗୁରୁତ୍ୱପୂର୍ଣ୍ଣ ବୈଠକ ବସିଥିବା ଜଣାପଡ଼ିଛି । ଏହି ବୈଠକରେ ପ୍ରତିରକ୍ଷା ମନ୍ତ୍ରୀଙ୍କ ସହ ୩ ସେନାର ମୁଖ୍ୟ ଉପସ୍ଥିତ ରହିଥଇବା ଜଣାପଡ଼ିଛି । ସ୍ଥଳସେନା. ନୌସେନା ଓ ବାୟୁସେନା ମୁଖ୍ୟଙ୍କ ସହ ‘ଅଗ୍ନିପଥ’କୁ ନେଇ ବିଶେଷ ଆଲୋଚନା କରୁଛନ୍ତି ।

କେନ୍ଦ୍ର ସରକାରଙ୍କ ‘ଅଗ୍ନିପଥ’ ଯୋଜନାକୁ ବିରୋଧ କରି ଗତ ବୁଧବାରଠାରୁ ଆରମ୍ଭ ହୋଇଛି ହିଂସାତ୍ମକ ବିକ୍ଷୋଭ । ଏହି ବିକ୍ଷୋଭ ସାରା ଦେଶରେ ଦେଖିବାକୁ ମିଳିଲାଣି । ବିହାରରୁ ଏହି ବିକ୍ଷୋଭ ଆରମ୍ଭ ହୋଇ ବର୍ତ୍ତମାନ ଦେଶର ପ୍ରୟା ଅଧିକାଂଶ ରାଜ୍ୟକୁ ବ୍ୟାପିଗଲାଣି । ଗୁରୁବାର ବିହାରରେ ବିକ୍ଷୋଭକାରୀ ଗୋଟିଏ ଟ୍ରେନ୍‌ ପୋଡ଼ିଥିବାବେଳେ ଶୁକ୍ରବାର ବିହାର, ଉତ୍ତର ପ୍ର​‌ଦେଶ ଓ ତେଲଙ୍ଗାନା ଆଦି ରାଜ୍ୟରେ ମୋଟ ୧୨ଟି ଟ୍ରେନ୍‌ରେ ନିଆଁ ଲଗାଇ ଦିଆଥିଲେ । ପରେ ପରେ ଅନେକ ରାଜ୍ୟରେ ହିଂସା ଦେଖିବାକୁ ମିଳିଲାଣି । ଯାହାକୁ ନେଇ କେନ୍ଦ୍ର ସରକାରଙ୍କ ଚିନ୍ତା ବଢ଼ିଛି । ଏହି କାରଣରୁ ବର୍ତ୍ତମାନ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ଏକ ବୈଠକ ଡକାଇବା ସହ ତିନି ସେନାର ମୁଖ୍ୟଙ୍କ ସହ ଗୁରୁତ୍ୱପୂର୍ଣ୍ଣ ଆଲୋଚନା କରୁଛନ୍ତି ।

ଏହି ‘ଅଗ୍ନିପଥ’ ଯୋଜନା କାରଣରୁ ତେଲଙ୍ଗାନାର ସିକନ୍ଦରାବାଦ ଠାରେ ଜ​‌ଣେ ବିକ୍ଷୋଭକାରୀଙ୍କ ମୃତ୍ୟୁ ଘଟିଛି । ୧୫ରୁ ଅଧିକ ଆହତ ହୋଇ ଡାକ୍ତରଖାନାରେ ଭର୍ତ୍ତି ହୋଇଛି । ବର୍ତ୍ତମାନ ମଧ୍ୟ କେତେକାଂଶ ସ୍ଥାନରେ ପୁଲିସ ବହୁ ସଂଖ୍ୟକ ବିକ୍ଷୋଭକାରୀଙ୍କୁ ଅଟକ ରଖିଛି ।