କଲ୍ୟାଣସିଂହପୁର: ରାୟଗଡ଼ା ଜିଲ୍ଲା କଲ୍ୟାଣସିଂହପୁର ବ୍ଲକ ସଦର ମହକୁମାଠାରେ ଚଇତରାଇ ପର୍ବ ଆରମ୍ଭ ହୋଇଛି । ଏହି ଅବସରରେ ସ୍ଥାନୀୟ ଗ୍ରାମଦେବୀ ମନ୍ଦିରରେ ସୋମବାର ରାତ୍ରି ୯ ଘଣ୍ଟାରେ ମା’ଙ୍କ ପୀଠରେ ପୂଜାର୍ଚ୍ଚନା କରାଯାଇ ମା’ଙ୍କ ପାଦ ବେହେରା ସାହିଠାରେ ଥିବା ପାଟଖଣ୍ଡା ମନ୍ଦିରକୁ ଆଣିଥା’ନ୍ତି । ମା’ଙ୍କ ପାଦ ଆଣିବା ବେଳେ ବାଦ୍ୟ, ଶଙ୍ଖ, ବାଣ, ହୁଳହୁଳି ବଜାଇ ପାଛୋଟି ଆଣିଥା’ନ୍ତି । ମାନସିକଧାରୀମାନେ ମା’ଙ୍କ ପାଦ ଆଣିବା ବେଳେ ରାସ୍ତାରେ ଲୁଗା ବିଛାଇ ଆଣିଥାନ୍ତି । ମଙ୍ଗଳବାର ଚଇତରାଇ ଘଟକୁ ପାଟହାଣ୍ଡି ଓ ଚାଙ୍ଗୁଡ଼ିକୁ ପୂଜକମାନେ ପ୍ରଥମେ ମନ୍ଦିର ପରିଚାଳକ ବା ପରିଛାଙ୍କ ଘରକୁ ନେଇ ସେହିଠାରେ ମା’ଙ୍କୁ ପୂଜାର୍ଚ୍ଚନା କରାଯିବା ପରେ ଗାଁର ପ୍ରତ୍ୟେକ ସାହିର ଘରଘର ବୁଲି ପୂଜା ପାଇଥା’ନ୍ତି । ଆସନ୍ତାକାଲିଠାରୁ ସେହି ବ୍ଲକର ୧୪ ପଞ୍ଚାୟତର ସବୁ ଗାଁ ବୁଲି ପୂଜା ପାଇବେ । ଏହା ୯ ଦିନ ଧରି ଦିନ ତମାମ ଗାଁ ପରିକ୍ରମା କରିବା ପରେ ରାତିରେ ଅସ୍ଥାୟୀ ମଣ୍ଡପକୁ ବିଜେ କରି ଥାଆନ୍ତି।
ଏହି ପର୍ବ ପାଳନ କଲେ ଗ୍ରାମର ମଙ୍ଗଳ ତଥା ବନ୍ୟା ପରିସ୍ଥିତିରୁ ବଞ୍ଚିବା, ମରୁଡ଼ିରୁ ରକ୍ଷା ପାଇବା, ଗାଁକୁ ଘଣ୍ଟ ଘୋଡାଇ ରଖିବା ପାଇଁ ମା’ଙ୍କୁ ଭକ୍ତି ଭାବରେ ପୂଜାର୍ଚ୍ଚନା କରିଥାନ୍ତି । ନଅ ଦିନ ପରେ ମା’ଙ୍କୁ ଶୀତଳ ଭୋଗ ଦେଇ ଉଦଯାପନ କରାଯିବ । ଏହି ପର୍ବକୁ ଗ୍ରାମବାସୀ, ବୟୋଜ୍ୟେଷ୍ଠ, ବୁଦ୍ଧିଜୀବୀ, ସ୍ଥାନୀୟ ସରପଞ୍ଚ ଗୌତମ ବାର୍ଲି ଉପସ୍ଥିତ ରହି ପରିଚାଳନା କରିଛନ୍ତି ।
Comments are closed.