ସ୍ବାସ୍ଥ୍ୟ କ୍ଷେତ୍ରରେ ଓଡ଼ିଶାର ପାଦ ଆଗକୁ : ୭ବର୍ଷରେ ୫ପ୍ରତିଶତ ଅଙ୍କ ବଢ଼ିଛି

ଭୁବନେଶ୍ବର : ସ୍ବାସ୍ଥ୍ୟସେବା କ୍ଷେତ୍ରରେ ଓଡ଼ିଶାକୁ ଯେଭଳି ଭାବେ ବିରୋଧୀ ଚିତ୍ରଣ କରୁଛନ୍ତି ତାହା ବାସ୍ତବରେ ସତ୍ୟ ନୁହେଁ। ସ୍ବାସ୍ଥ୍ୟ ଭିତ୍ତିଭୂମି କ୍ଷେତ୍ରରେ ଓଡ଼ିଶା ଆଗକୁ ପାଦେ ଲେଖାଏଁ ବଢ଼ୁଛି। ଏକଥା ଆମେ ନୁହେଁ ଭାରତ ସରକାରଙ୍କ ନୀତି ଆୟୋଗର ସ୍ବାସ୍ଥ୍ୟ ସୂଚକାଙ୍କ(ଇନଡେକ୍ସ) କହୁଛି। ସୋମବାର ଭାରତ ସରକାରଙ୍କ ସ୍ବାସ୍ଥ୍ୟ ମନ୍ତ୍ରାଳୟ ପକ୍ଷରୁ ଜାରି ତଥ୍ୟ ଅନୁଯାୟୀ ଓଡ଼ିଶା ଦେଶର ୧୪ତମ ସ୍ଥାନରେ ରହିଛି। ସର୍ବପ୍ରଥମେ କେରଳ ରହିଥିବାବେଳେ ଦ୍ବିତୀୟରେ ତାମିଲନାଡୁ ରହିଛି। ମାତ୍ର ସବୁଠାରୁ ପଛରେ ପଡ଼ିଥିବା ଜନବହୁଳ ରାଜ୍ୟ ଉତ୍ତରପ୍ରଦେଶରେ ଏବେ ସ୍ବାସ୍ଥ୍ୟ ଭିତ୍ତିଭୂମି କ୍ଷୀପ୍ର ବେଗରେ ଆଗେଇ ଚାଲିଛି। ଦେଶରେ ୫.୫୧ପ୍ରତିଶତରୁ ଊର୍ଦ୍ଧ୍ବ ବେଗରେ ଗତି କରୁଛି। ଯଦିଓ ଦକ୍ଷିଣ ଭାରତୀୟ ରାଜ୍ୟ ସ୍ବାସ୍ଥ୍ୟ ଭିତ୍ତିଭୂମି କ୍ଷେତ୍ରରେ କ୍ଷୀପ୍ରଗତିରେ ଆଗକୁ ବଢ଼ୁଛନ୍ତି ତଥାପି ଓଡ଼ିଶାର ପାଦ ଆଗକୁ ରହିଥିବା ଜଣାଯାଇଛି। ଗତ ୭ବର୍ଷରେ ଓଡ଼ିଶା ସ୍ବାସ୍ଥ୍ୟସେବା କ୍ଷେତ୍ରରେ ୫ପ୍ରତିଶତ ଅଙ୍କ ବୃଦ୍ଧି ହୋଇଛି। ୨୦୧୪-୧୫ବର୍ଷରେ ରାଜ୍ୟରେ ସ୍ବାସ୍ଥ୍ୟ ସୂଚାକାଙ୍କ ୩୯.୨୩ ଥିବାବେଳେ ଏବେ ଏହା ୪୪.୩୧ ଅଙ୍କରେ ପହଞ୍ଚିଛି।
ନୀତି ଆୟୋଗ ପକ୍ଷରୁ ୨୦୧୮-୧୯ ଆଧାର ବର୍ଷ ଏବଂ ୨୦୧୯-୨୦ ରେଫରେନ୍ସ ବର୍ଷ ଭାବେ ହିସାବକୁ ନିଆଯାଇଥିଲା। ତଥ୍ୟ ଅନୁଯାୟୀ ୨୦୧୮-୧୯ରେ ଓଡ଼ିଶା ୪୪.୧୮ ଅଙ୍କ(ସ୍କୋର) ରଖିଥିବାବେଳେ ୨୦୧୯-୨୦ରେ ଏହା ୪୪.୩୧ ଅଙ୍କକୁ ବୃଦ୍ଧି ପାଇଥିଲା। ୨୦୧୮ବର୍ଷ ତୁଳନାରେ ୨୦୧୯-୨୦ରେ ମାତ୍ର .୧୩ ଅଙ୍କ ବୃଦ୍ଧିକୁ ନେଇ ନୀତି ଆୟୋଗ ଓଡ଼ିଶାକୁ ୧୪ତମ ସ୍ଥାନରେ ରଖିଥିଲା। ଅନ୍ୟପକ୍ଷରେ ୨୦୧୪-୧୫ରେ ୩୯.୨୩ ଅଙ୍କରେ ଓଡ଼ିଶା ରହିଥିବାବେଳେ ଏହା ୨୦୧୫-୧୬ରେ ୩୯.୪୩ରେ ପହଞ୍ଚିଥିଲା। ୨୦୧୭-୧୮ରେ ୩୫.୯୭ ଏବଂ ୨୦୧୭-୧୮ରେ ୪୨.୫୧ ରହିଥିଲା। ସ୍ବାସ୍ଥ୍ୟସେବା କ୍ଷେତ୍ରରେ ଓଡ଼ିଶାର ପାଦ ମନ୍ଥର ଗତିରେ ଆଗକୁ ବଢ଼ୁଥିବାବେଳେ ଉତ୍ତରପ୍ରଦେଶ, ଆସାମ, ତେଲେଙ୍ଗାନା ପ୍ରଭୃତି ରାଜ୍ୟ କ୍ଷୀପ୍ର ଗତିରେ ବଢ଼ୁଛି।
କେନ୍ଦ୍ରଶାସିତ ଅଞ୍ଚଳଗୁଡ଼ିମ ମଧ୍ୟରେ ଦିଲ୍ଲୀ ଓ ଜାମ୍ମୁ କାଶ୍ମୀର ସବୁଠାରୁ ନିମ୍ନରେ ଅଛନ୍ତି। ସ୍ବାସ୍ଥ୍ୟ ସେବାର ଗୁଣବତ୍ତାକୁ ନେଇ ବିଶ୍ବ ବ୍ୟାଙ୍କ ନିୟମ ଆଧାରରେ ନୀତି ଆୟାଗ ଏହି ସୂଚକାଙ୍କ ଘୋଷଣା କରିଥା’ନ୍ତି।