କାନପୁର : ଟି-ଟ୍ୱେଣ୍ଟି ସିରିଜରେ ନ୍ୟୁଜିଲାଣ୍ଡକୁ ୩-୦ରେ ପରାସ୍ତ କରିବା ପରେ ଟିମ୍ ଇଣ୍ଡିଆ ଏବେ ନ୍ୟୁଜିଲାଣ୍ଡ ବିପକ୍ଷରେ ଦୁଇ ମ୍ୟାଚ୍ ବିଶିଷ୍ଟ ଟେଷ୍ଟ ଶୃଙ୍ଖଳା ଖେଳିବାକୁ ଯାଉଛି । ପ୍ରଥମ ଟେଷ୍ଟ ମ୍ୟାଚ୍ ଆସନ୍ତାକାଲି ଗୁରୁବାର କାନ୍ପୁର ଗ୍ରୀନ୍ ପାର୍କ ଷ୍ଟାଡିୟମରେ ଖେଳାଯିବ । ନ୍ୟୁଜିଲାଣ୍ଡ ପୂର୍ବରୁ କେବେ ଭାରତରେ ଟେଷ୍ଟ ଶୃଙ୍ଖଳା ଜିତି ନାହିଁ । କେ.ଏଲ୍. ରାହୁଲ୍ ଆହତ ହୋଇଥିବାରୁ ତାଙ୍କୁ ଦୁଇଟି ଯାକ ଟେଷ୍ଟରୁ ବାଦ୍ ଦିଆଯାଇଛି । ରାହୁଲଙ୍କ ଅନୁପସ୍ଥିତି ଭାରତୀୟ ଟିମ୍ ପାଇଁ ଏକ ବଡ଼ ବିପର୍ଯ୍ୟୟ ଭାବେ ବିବେଚନା କରାଯାଉଛି । ରୋହିତ ଶର୍ମା ଓ ବିରାଟ୍ କୋହଲି ମଧ୍ୟ ଏହି ଟେଷ୍ଟ ମ୍ୟାଚରେ ଖେଳୁ ନାହାନ୍ତି । ବିରାଟ କୋହଲି ମୁମ୍ବାଇରେ ହେବାକୁ ଥିବା ଦ୍ୱିତୀୟ ଟେଷ୍ଟରେ ଖେଳିବାକୁ ଥିବାବେଳେ ରୋହିତ ଶର୍ମା ଦୁଇଟି ଯାକ ଟେଷ୍ଟ ଖେଳୁ ନାହାନ୍ତି ।
ବିସିସିଆଇରୁ ମିଳିଥିବା ସୂଚନା ଅନୁସାରେ ଅଜିଙ୍କ୍ୟ ରାହାଣେ ଦଳର ଅଧିନାୟକ ଦ୍ବାୟିତ୍ବ ତୁଲାଇବେ। ଦଳର ଅନ୍ୟ ଖେଳାଳିମାନଙ୍କ ମଧ୍ୟରେ ମୟଙ୍କ ଅଗ୍ରୱାଲ୍, ଚେତେଶ୍ୱର ପୂଜାରା, ସୁବ୍ମନ ଗିଲ୍, ଶ୍ରେୟସ୍ ଆୟର୍, ସୂର୍ଯ୍ୟ କୁମାର ଯାଦବ, ରିଦ୍ଦିମାନ୍ ଶାହା, କେ.ଏସ୍. ଭାରତ, ରବୀନ୍ଦ୍ର ଜାଡେଜା, ଆର୍. ଅଶ୍ୱିନୀ, ଅକ୍ସର୍ ପଟେଲ୍, ଜୟନ୍ତ ଯାଦବ, ଇଶାନ୍ତ ଶର୍ମା, ଉମେଶ ଯାଦବ, ମହମ୍ମଦ ସିରାଜ୍, ପ୍ରସିଦ୍ଧ କ୍ରୀଷ୍ଣା ଅଛନ୍ତି ।
