ବେଗୁନିଆ: ସରକାର ଆଜିଠାରୁ ଚଳିତ ମାସ ୧୯ ତାରିଖ ପର୍ୟ୍ୟନ୍ତତାଲା ବନ୍ଦ ଘୋଷଣା କରିଥିବାବେଳେ ବିଭିନ୍ନ ସ୍ଥାନରେ ଥିବା ପୀଡିତ, ପରିତ୍ୟକ୍ତ, ଉପବାସ କିମ୍ବା ଅନାହାରରେ ରହୁଥିବା ଲୋକମାନଙ୍କୁ ଚିହ୍ନଟ କରି ସେମାନଙ୍କୁ ରୋଷେଇ କରି କିମ୍ବା ପ୍ୟାକେଟ ନଚେତ ଶୁଖିଲା ଖାଦ୍ୟ ଦିନକୁ ଦୁଇଥର ଦେବାପାଇଁ ସମସ୍ତ ଜିଲ୍ଲାପାଳଙ୍କୁ ଗତ ୪ ତାରିଖରେ ଏସଆରସି ନିର୍ଦେଶ ଦେଇଛନ୍ତି । ତାଲା ବନ୍ଦ ସମୟରେ ଗ୍ରାମାଞ୍ଚଳରେ ବହୁ ପୀଡିତ, ଅସୁସ୍ଥ, ପରିତ୍ୟକ୍ତ, ଅସହାୟ, ଅଭାବଗ୍ରସ୍ତ ଏବଂ ଅନାହାରରେ ବହୁ ଲୋକ ରହୁଥିବାରୁ ସେମାନେ ଏହି ସମୟରେ ଖାଦ୍ୟ ଠିକ ଭାବରେ ପାଇ ପାରିବେ ନାହିଁ । ତେଣୁ ଅନାହାର ମୃତ୍ୟୁକୁ ଏଡ଼ାଇବା ପାଇଁ ସରକାର ବିଭିନ୍ନ ସ୍ଥାନରେ ଥିବା ଏହି ବର୍ଗର ସମସ୍ତ ବ୍ୟକ୍ତିଙ୍କୁ ଆଜିଠାରୁ ୧୯ ତାରିଖ ପର୍ୟ୍ୟନ୍ତ ରନ୍ଧା, ପ୍ୟାକେଟ କିମ୍ବା ଶୁଖିଲା ଖାଦ୍ୟ ଦୈନିକ ଦୁଇଓଳି ଯୋଗାଇଦେବା ପାଇଁ ନିର୍ଦେଶ ଦେଇଛନ୍ତି । ଯେଉଁଠାରେ ଦୁଇଓଳି ରୋଷେଇ କରି ଦିଆ ନ ଯାଇପାରିବ ସେଠାରେ ଗୋଟିଏ ଓଳି ଗରମ ଖାଦ୍ୟ ଏବଂ ଆଉ ଗୋଟିଏ ଓଳି ଶୁଖିଲା ଖାଦ୍ୟ ଯୋଗାଇ ଦେବା ପାଇଁ ନିର୍ଦେଶ ଦେଇଛନ୍ତି । ବଡ଼ମାନଙ୍କ ମିଲ ଗୋଟିକ ୪୦ ଟଙ୍କା ରଖା ଯାଇଥିବାବେଳେ ପିଲାମାନଙ୍କ ପାଇଁ ୨୪ ଟଙ୍କା ରଖାଯାଇଛି । ଖାଦ୍ୟ ଦେବାବେଳେ ସାମାଜିକ ଦୂରତା ରଖାଯିବା ସହିତ ଗୋଟିଏ ସ୍ଥାନରେ ସମସ୍ତେ ଖାଦ୍ୟ ନେଇପାରିବେ ନାହିଁ । ଆଜିଠାରୁ ଖାଦ୍ୟ ଦେବାପାଇଁ ସ୍ପଷ୍ଟ ନିର୍ଦେଶ ଥିବାବେଳେ ଆଜି ବେଗୁନିଆ ବ୍ଲକର କୌଣସି ସ୍ଥାନରେ ସମ୍ପୃକ୍ତ ବ୍ୟକ୍ତିମାନଙ୍କୁ ଖାଦ୍ୟ ଦିଆଯାଇନାହିଁ କିମ୍ବା ଏସଆରସିଙ୍କ ନିର୍ଦେଶକୁ କାର୍ୟ୍ୟକାରୀ କରାଯାଇନାହିଁ । ଫଳରେ ବହୁ ଅସହାୟ ବ୍ୟକ୍ତି ଖାଦ୍ୟ ପାଇବାରୁ ବଞ୍ଚିତ ହୋଇଛନ୍ତି।
Comments are closed.