କମଲା ହାରିସ ଆମେରିକାର ଉପରାଷ୍ଟ୍ରପତି ହେବା ଦ୍ୱାରା ଭାରତ ଏବଂ ଆମେରିକା ମଧ୍ୟରେ ସମ୍ପର୍କ ମଜବୁତ ହେବ ବୋଲି ହ୍ବାଇଟ ହାଉସ ପକ୍ଷରୁ ସୂଚନା ମିଳିଛି।
ହ୍ବାଇଟ ହାଉସର ପ୍ରେସ ସଚିବ ଜେନ ସାକି ଏକ ଦୈନିକ ସାମ୍ବାଦିକ ସମ୍ମିଳନୀରେ କହିଛନ୍ତି ଯେ, ରାଷ୍ଟ୍ରପତି ଜୋ ବାଇଡେନ ଦୁଇ ଦେଶ ମଧ୍ୟରେ ଦୀର୍ଘ ଦିନ ଧରି ଚାଲିଆସୁଥିବା ଦ୍ୱିପାକ୍ଷିକ ସଫଳ ସମ୍ପର୍କକୁ ସମ୍ମାନ ଦେଇଛନ୍ତି।
ବାଇଡେନ ପ୍ରଶାସନରେ ଭାରତ-ଆମେରିକା ସମ୍ପର୍କକୁ ନେଇ ଏକ ପ୍ରଶ୍ନର ଉତ୍ତରରେ ସାକି କହିଛନ୍ତି ଯେ. ରାଷ୍ଟ୍ରପତି ବାଇଡେନ ଅନେକ ଥର ଭାରତ ଗସ୍ତ କରିଛନ୍ତି। ଭାରତ ଏବଂ ଆମେରିକାର ନେତାଙ୍କ ମଧ୍ୟରେ ଦୀର୍ଘ ଦିନର ସଫଳ ଦ୍ୱିପାକ୍ଷିକ ସମ୍ପର୍କକୁ ସେ ସମ୍ମାନ କରନ୍ତି, ଏହାର ଗୁରୁତ୍ୱକୁ ସ୍ୱୀକାର କରନ୍ତି। ଏହାକୁ ଆଗକୁ ନେବାକୁ ବାଇଡେନ ପ୍ରଶାସନ ଆଶାବାଦୀ।
ଭାରତୀୟ ବଂଶୋଦ୍ଭବ କମଲା ହାରିସ ଉପରାଷ୍ଟ୍ରପତି ହେବା ଦ୍ୱାରା ଏହି ସମ୍ପର୍କ ଆହୁରି ମଜବୁତ ହେବ ବୋଲି ସାକି କହିଛନ୍ତି। ବାଇଡେନ ହାରିସଙ୍କୁ ମନୋନୀତ କରିଛନ୍ତି ଏବଂ ସେ ଆମେରିକାର ଉପରାଷ୍ଟ୍ରପତି ହେବାରେ ପ୍ରଥମ ଭାରତୀୟ। ନିଶ୍ଚିତ ଭାବେ ଏହା କେବଳ ଭାରତ ପାଇଁ ଐତିହାସିକ ମୁହୂର୍ତ୍ତ ନୁହେଁ, ବରଂ ଏହା ଭାରତ- ଆମେରିକା ସମ୍ପର୍କକୁ ଆହୁରି ମଜବୁତ କରିବ ବୋଲି ଆଶା କରାଯାଉଛି।
ଜାନୁଆରୀ ୨୦ରେ ଜୋ ବାଇଡେନ ରାଷ୍ଟ୍ରପତି ଭାବରେ ଏବଂ କମଲା ହାରିସ୍ ଉପରାଷ୍ଟ୍ରପତି ଭାବରେ ଶପଥ ଗ୍ରହଣ କରିଥିଲେ। କମଲା ହାରିସ୍ ହେଉଛନ୍ତି ପ୍ରଥମ କଳା ଏବଂ ଆଫ୍ରିକୀୟ-ଏସୀୟ ମହିଳା ଯିଏକି ଆମେରିକାରେ ଏତେ ବଡ଼ ପଦବୀରେ ଅବସ୍ଥାପିତ ହୋଇଛନ୍ତି। କମଲା ହାରିସଙ୍କ ମା ଶ୍ୟାମଲା ଚେନ୍ନାଇର ଏକ ଗାଁର ଥିଲେ, କମଲା ହାରିସ ଆମେରିକାର ଉପରାଷ୍ଟ୍ରପତି ହେବା ଭାରତୀୟଙ୍କ ପାଇଁ ଗର୍ବର ବିଷୟ ।
