ବାଙ୍କୀ ଡବଲ ମର୍ଡର ଘଟଣା : ୧୦ ମାସ ପରେ ଧରାପଡ଼ିଲା ଆଉ ଜଣେ ଅଭିଯୁକ୍ତ

ବାଙ୍କୀ/ବୈଦ୍ୟେଶ୍ବର : ବାଙ୍କୀର ବହୁ ଚର୍ଚ୍ଚିତ ଖଜୁରିପଦା ଡବଲ ମର୍ଡର ଘଟଣାରେ ଆଉଜଣେ ଅଭିଯୁକ୍ତ ରଞ୍ଜିତ ପ୍ରଧାନଙ୍କୁ ରବିବାର ବିଳମ୍ବିତ ରାତିରେ ଗିରଫ କରାଯାଇଛି। ବାଙ୍କୀ ଉପଖଣ୍ଡ ପୁଲିସ ଅଧିକାରୀ ଆଲୋକ ରଞ୍ଜନ ରାୟଙ୍କ ନେତୃତ୍ୱରେ ଏକ ଦଳ ବଡମ୍ବା ଅଞ୍ଚଳରେ ଚଢ଼ଉ କରି ରଞ୍ଜିତଙ୍କୁ ଗିରଫ କରିଛି। ସୋମବାର ଅଭିଯୁକ୍ତର ସ୍ୱାସ୍ଥ୍ୟ ପରୀକ୍ଷା ସହ କୋଭିଡ୍‌ ପରୀକ୍ଷା କରାଯିବା ପରେ କୋର୍ଟ ଚାଲାଣ କରାଯାଇଥିଲା। ତାର ଜାମିନ ଆବେଦନ ଖାରଜ ହେବାପରେ ବାଙ୍କୀ ଉପକାରାଗାରକୁ ପଠାଇ ଦିଆଯାଇଛି।
ସୂଚନାଯୋଗ୍ୟ, ୨୦୨୦ ଫେବୃୟାରୀ ୧୫ରେ ବାଙ୍କୀ ଥାନା ଅନ୍ତର୍ଗତ କିଆପଲ୍ଲା ଜୋକଲାଞ୍ଜି ଜଳସେଚନ ପ୍ରକଳ୍ପ ନିକଟରେ ନୂଆଗାଁ ପଞ୍ଚାୟତ ସରପଞ୍ଚ ମମତା ମହାପାତ୍ରଙ୍କ ସ୍ୱାମୀ ଭଗବାନ ସ୍ବାଇଁ ଏବଂ ଖଜୁରିପଦା ଗ୍ରାମର ସାମ୍ବାଦିକ ଆଦିତ୍ୟ କୁମାର ରଣସିଂହଙ୍କୁ ଦୁର୍ବୃତ୍ତ ଗୋଡ଼ାଇ ଗୋଡ଼ାଇ ମାରଣାସ୍ତ୍ରରେ ଆକ୍ରମଣ କରିଥିଲେ। ଘଟଣା ସ୍ଥଳରେ ଆଦିତ୍ୟଙ୍କ ମୃତ୍ୟୁ ହୋଇଥିବାବେଳେ କଟକ ବଡ଼ ଡାକ୍ତରଖାନାରେ ଭଗବାନଙ୍କ ମୃତ୍ୟୁ ଘଟିଥିଲା। ଏ ନେଇ ଆଦିତ୍ୟଙ୍କ ସମ୍ପର୍କୀୟ ଭାଇ ତଥା ଘଟଣାର ପ୍ରତ୍ୟକ୍ଷଦର୍ଶୀ ମାନସ ରଞ୍ଜନ ସିଂ ବାଙ୍କୀ ଥାନାରେ ଅଭିଯୋଗ କରିବାପରେ ମାମଲା ରୁଜୁ ହୋଇଥିଲା। ଏହି ଘଟଣାରେ ପୂର୍ବରୁ ୧୨ଜଣଙ୍କୁ ପୁଲିସ ଗିରଫ କରିଥିଲା। ରଞ୍ଜିତଙ୍କ ଗିରଫ ପରେ ସଂଖ୍ୟା ୧୩ରେ ପହଞ୍ଚିଛି।