ବଡ଼ମ୍ବା ବିଧାନସଭା ଲାଗି ନାମାଙ୍କନ ପତ୍ର ଦାଖଲ କଲେ ଦେବୀପ୍ରସାଦ ମିଶ୍ର

ବଡ଼ମ୍ବା/ଆଠଗଡ଼: ଦେଶରେ ୬ଷ୍ଠ ପର୍ଯ୍ୟାୟ ଏବଂ ରାଜ୍ୟର ୩ୟ ପର୍ଯ୍ୟାୟ ନିର୍ବାଚନ ପାଇଁ ବିଜ୍ଞପ୍ତି ଜାରି ହେବାର ୨ୟ ଦିନରେ ମଙ୍ଗଳବାର ବଡମ୍ବା ନିର୍ବାଚନ ମଣ୍ଡଳୀ ପାଇଁ ବିଜୁ ଜନତା ଦଳର ବରିଷ୍ଠ ଉପସଭାପତି ଦେବୀ ପ୍ରସାଦ ମିଶ୍ର ନିଜର ନାମାଙ୍କନ ପତ୍ର ୮୭-ବଡମ୍ବା ନିର୍ବାଚନ ମଣ୍ଡଳୀର ନିର୍ବାଚନ ଅଧିକାରୀଙ୍କ ନିକଟରେ ଦାଖଲ କରିଛନ୍ତି। ୭ମ ଥର ପାଇଁ ବିଜୁ ଜନତା ଦଳ ପ୍ରାର୍ଥୀ ଭାବେ ନିର୍ବାଚନ ଲଢୁଥିବା ଦେବୀ ପ୍ରସାଦ ମିଶ୍ର ଆରାଧ୍ୟା ମା ଭଟ୍ଟାରିକାଙ୍କ ପୀଠରେ ପୂଜାର୍ଚ୍ଚନା ପରେ ପ୍ରାୟ ୧୦ହଜାରରୁ ଊର୍ଦ୍ଧ୍ବ ସମର୍ଥକଙ୍କ ସହିତ ଏକ ବିଶାଳ ପଟୁଆରରେ ଆସି କଟକ ଲୋକସଭା ବିଜେଡି ପ୍ରାର୍ଥୀ ଡଃ ସନ୍ତୃପ୍ତ ମିଶ୍ରଙ୍କ ଉପସ୍ଥିତିରେ ଆଠଗଡ଼ ଉପଜିଲ୍ଲାପାଳ ତଥ ନିର୍ବାଚନ ଅଧିକାରୀଙ୍କ ନିକଟରେ ନିଜର ନାମାଙ୍କନ ପତ୍ର ଦାଖଲ କରିଥିଲେ। ଶୀ ମିଶ୍ର ୧୯୯୫ରୁ ପ୍ରଥମେ ଜନତା ଦଳ ଓ ପରେ ବିଜୁ ଜନତା ଦଳ ପ୍ରାର୍ଥୀ ଭାବେ ବଡମ୍ବା ନିର୍ବାଚନ ମଣ୍ଡଳୀରୁ ଲଗାତାର ୬ଥର ପ୍ରତିଦ୍ୱନ୍ଦିତା କରି ବିଜୟୀ ହେବା ସହ ରାଜ୍ୟ ମନ୍ତ୍ରୀ ମଣ୍ଡଳରେ ବହୁ ଗୁରୁତ୍ୱପୂର୍ଣ୍ଣ ବିଭାଗର ମନ୍ତ୍ରୀ ପଦ ଅଳଂକୃତ କରିଥିଲେ। ଶ୍ରୀ ମିଶ୍ର ନିର୍ବାଚନ ଅଧିକାରୀଙ୍କ ନିକଟରେ ୪ସେଟ୍‌‌ ପ୍ରାର୍ଥୀପତ୍ର ଦାଖଲ କରିଥିବାବେଳେ ସେଗୁଡିକରରେ ରଘୁପତି ମହାନ୍ତି, ନିର୍ମଳ କୁମାର ଜେନା, ମେଘନାଦ ପାତ୍ର ଓ ପ୍ରଦୀପ୍ତ କୁମାର ସ୍ୱାଇଁ ପ୍ରସ୍ତାବକ ରହିଥିବା ଜଣାପଡ଼ିଛି। ଶ୍ରୀ ମିଶ୍ରଙ୍କ ସହ କଟକ ଜିଲ୍ଲାପରିଷଦ ସଭାପତି କିଶୋର ଚନ୍ଦ୍ର ମିଶ୍ର, ବିଜେଡି ରାଜ୍ୟ ସାଧାରଣ ସଂପାଦକ ପ୍ରଫୁଲ୍ଲ ସିଂହ, କଟକ କେନ୍ଦ୍ର ସମବାୟ ବ୍ୟାଙ୍କ ସଭାପତି ପ୍ରଭାତ କାନୁନଗୋ,ବଡମ୍ବା ଓ ନରସିଂହପୁର ବ୍ଲକର ଅଧ୍ୟକ୍ଷଙ୍କ ସମେତ ସମସ୍ତ ନିର୍ବାଚିତ ଜିଲ୍ଲାପରିଷଦ ଓ ପଞ୍ଚାୟତ ପ୍ରତିନିଧି, ବହୁ ତୁଙ୍ଗନେତା ଶ୍ରୀ ମିଶ୍ରଙ୍କ ନାମାଙ୍କନ ବେଳେ ଉପସ୍ଥିତ ଥିଲେ।