ନୂଆଦିଲ୍ଲୀ : ମନିଲଣ୍ଡରିଂ ମାମଲାରେ ସିବିଆଇ ସ୍ୱତନ୍ତ୍ର କୋର୍ଟ ସୋମବାର ଆର୍ଜେଡି ମୁଖ୍ୟ ଲାଲୁ ପ୍ରସାଦ ଯାଦବଙ୍କ ଝିଅ ମିଶା ଭାରତୀ ଏବଂ ତାଙ୍କ ସ୍ୱାମୀ ଶୈଳେଶ କୁମାରଙ୍କୁ ଜାମିନ ପ୍ରଦାନ କରିଛନ୍ତି। ଅନୁମତି ବିନା ଦେଶ ନ ଛାଡିବା ସର୍ତ୍ତରେ ସେମାନଙ୍କୁ ଜାମିନ ପ୍ରଦାନ କରାଯାଇଛି। ଏହି ଦମ୍ପତିଙ୍କ ବିରୋଧରେ ବେଆଇନ ଅର୍ଥ କାରବାର ନେଇ ୨୦୧୭ ଡିସେମ୍ବରରେ ଅଭିଯୋଗଫର୍ଦ ଦାଖଲ କରାଯାଇଥିଲା। କିନ୍ତୁ ସ୍ୱାମୀ ଶୈଳେଶ ଓ ତାଙ୍କର ଜଣେ ଚାର୍ଟାର୍ଡ ଆକାଉଣ୍ଟାଣ୍ଟ ବିବାଦୀୟ ଅର୍ଥ କାରବାରର ତଦାରଖ କରୁଥିଲେ। ଇତିମଧ୍ୟରେ ସମ୍ପୃକ୍ତ ଚାର୍ଟାର୍ଡ ଆକାଉଣ୍ଟାଣ୍ଟଙ୍କ ମୃତ୍ୟୁ ଘଟିଛିବୋଲି ମିଶା ପ୍ରବର୍ତ୍ତନ ନିର୍ଦେଶାଳୟ (ଇଡି) ନିକଟରେ ବୟାନ ଦେଇଥିବା ଜଣାପଡିଛି। ୧୦ ଦିନ ପୂର୍ବେ ମିଶାଙ୍କର ଏକ ଫାର୍ମହାଉସ୍କୁ ପ୍ରବର୍ତ୍ତନ ନିର୍ଦେଶାଳୟ ସିଲ୍ କରିଥିଲା। ଦିଲ୍ଲୀର ପାଲାମ ଫାର୍ମ୍ସସ୍ଥିତ ଏହି ଫାର୍ମ ହାଉସ୍କୁ ୨୦୦୮-୦୯ରେ ୧.୨ କୋଟି ଟଙ୍କାରେ କ୍ରୟ କରାଯାଇଥିବା ବେଳେ ଏ ନେଇ ବେଆଇନ ଅର୍ଥ କାରବାର ହୋଇଥିଲା। ବେଆଇନ ଅର୍ଥ କାରବାର ଆଇନ (ପିଏମ୍ଏଲ୍ଏ) ଅଧୀନରେ ଇଡି ଫାର୍ମକୁ ସିଲ୍ କରିଥିବା ଜଣାପଡିଛି।
