ବେଙ୍ଗାଲୁରୁ: କର୍ଣ୍ଣାଟକରେ ଜନତା ଦଳ(ସେକୁଲାର) ଜେଡିଏସ ଓ କଂଗ୍ରେସ ମେଣ୍ଟ ସରକାର ଗଠନ କରିବା ସହ ମନ୍ତ୍ରିମଣ୍ଡଳର ବିସ୍ତାର କରିଛନ୍ତି। ତେବେ ପରିସ୍ଥିତିକୁ ତର୍ଜମା କଲେ ମନ୍ତ୍ରିମଣ୍ଡଳର ବିସ୍ତାର ସାଙ୍ଗକୁ ସରକାର ଅସନ୍ତୋଷଙ୍କ ବିସ୍ତାର ହେବାରେ ଲାଗିଥିବା ଦୃଶ୍ୟମାନ ହେଉଛି। ମୁଖ୍ୟତଃ କଂଗ୍ରେସ ବିଧାୟକଙ୍କ ମଧ୍ୟରେ ମନ୍ତ୍ରୀ ପଦ ପାଇଁ ଅସନ୍ତୋଷ ବୃଦ୍ଧି ପାଇବାରେ ଲାଗିଛି। ପୂର୍ବ ମନ୍ତ୍ରୀ ଏଚଏମ ରମନ୍ନା ଦଳ ଛାଡ଼ିବାକୁ ମନ ବଳାଇଥିବାର ଖବର ମଧ୍ୟ ଶୁଣିବାକୁ ମିଳୁଛି। ଶନିବାର ଆଉ ଜଣେ ବିଧାୟକ ମଧ୍ୟ ମନ୍ତ୍ରୀ ପଦକୁ ନେଇ ଗଣମାଧ୍ୟମରେ ମନ୍ତବ୍ୟ ଦେଇଛନ୍ତି। କଂଗ୍ରେସ ବିଧାୟକ ରାମାଲିଙ୍ଗ ରେଡ୍ଡି ମନ୍ତ୍ରୀ ପଦ ପାଇଁ ଧାରଣାରେ ବସିଛନ୍ତି। ବିଧାୟକଙ୍କ ସମର୍ଥକ ବେଙ୍ଗାଲୁରୁ ଟାଉନ ହଲ ସମ୍ମୁଖରେ ଧାରଣାରେ ବସିଛନ୍ତି।
୬ମେରେ କର୍ଣ୍ଣାଟକରେ ମନ୍ତ୍ରିମଣ୍ଡଳର ବିସ୍ତାର ହୋଇଥିଲା। ୨୫ଜଣ ବିଧାୟକଙ୍କୁ ଏଥିରେ କ୍ୟାବିନେଟରେ ସ୍ଥାନ ମିଳିଥିଲା। ଏଥିରେ କଂଗ୍ରେସର ୧୪ଜଣ ବିଧାୟକଙ୍କୁ କ୍ୟାବିନେଟ ପାହ୍ୟା ମିଳିଥିଲା। ତେବେ କର୍ଣ୍ଣାଟକ କଂଗ୍ରେସରେ ଅଧିକ ସଂଖ୍ୟକ ବିଧାୟକ ମନ୍ତ୍ରୀ ହେବାର ଆଶା ବାନ୍ଧି ବସିଛନ୍ତି। ସେମାନଙ୍କୁ ଦଳ ପକ୍ଷରୁ ବୁଝାସୁଝା କରାଯାଉ ଥିଲେ ମଧ୍ୟ ପରିସ୍ଥିତି କ୍ରମଶଃ ନିୟନ୍ତ୍ରଣ ବାହାରକୁ ଯାଉଥିବା ସ୍ପଷ୍ଟ ଦୃଶ୍ୟମାନ ହେଉଛି।
