ଆଠଗଡ଼/ବାଲେଶ୍ୱର: ଆଜି ରାଜ୍ୟର ଦୁଇଟି ସ୍ଥାନରେ ଅଂଶୁଘାତରେ ଦୁଇ ଜଣଙ୍କ ମୃତ୍ୟୁ ଘଟିଥିବା ଜଣାପଡ଼ିଛି। ଆଠଗଡ଼ ଅଞ୍ଚଳରେ ଅଂଶୁଘାତରେ ଜଣେ ଯୁବକଙ୍କ ମୃତ୍ୟୁ ଘଟିଥିବା ଅଭିଯୋଗ ହୋଇଛି। ମୃତକ ଜଣକ ରାଧାଗୋବିନ୍ଦପୁର ପଞ୍ଚାୟତ ଶୋଳଘରିଆ ଗ୍ରାମର ଗୋକୁଳାନନ୍ଦ ନାୟକ ବୋଲି ଜଣାପଡ଼ିଛି। ଦିନ ମଜୁରିଆ ଭାବେ କାମ କରୁଥିବା ଗୋକୁଳାନନ୍ଦ ବୁଧବାର ସକାଳେ ହାଟକୁ ଯାଇଥିବାବେଳେ ହଠାତ୍ ତଳେ ପଡ଼ିଯାଇଥିଲେ। ତାଙ୍କୁ ପରିବାର ଲୋକେ ଡାକ୍ତରଖାନାରେ ଭର୍ତ୍ତି କରିଥିଲେ। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଶବ ବ୍ୟବଚ୍ଛେଦ ରିପୋର୍ଟ ଆସିବା ପରେ ମୃତ୍ୟୁର ପ୍ରକୃତ କାରଣ ଜଣାପଡ଼ିବ ବୋଲି ପୁଲିସ କହିଛି। ସେହିପରି ବାଲେଶ୍ୱର କୁଲିଗାଁ ପଞ୍ଚାୟତ ଗମ୍ଭାରିଆ ଗ୍ରାମର ରଙ୍ଗ ମସ୍ତ୍ରୀ ଭାବେ କାମ କରୁଥିବା ନରେନ୍ଦ୍ର ବାରିକଙ୍କ ଅଂଶୁଘାତରେ ମୃତ୍ୟୁ ଘଟିଥିବା ତାଙ୍କ ପରିବାର ଲୋକେ ଅଭିଯୋଗ କରିଛନ୍ତି।
