ଲାଠୋର: ବଲାଙ୍ଗୀର ଜିଲା ହରିଶଙ୍କର ରୋଡ୍ ରେଳ ଷ୍ଟେସନ ରାସ୍ତାର ଅବସ୍ଥା ଶୋଚନୀୟ ହୋଇପଡିଥିବା ବେଳେ ସେହି କାଦୁଅ ରାସ୍ତା ଦେଇ ବିପଦ ପୂର୍ଣ୍ଣ ଅବସ୍ଥାରେ ଛାତ୍ରଛାତ୍ରୀ ତଥା ଜନସାଧାରଣ ଯିବା ଆସିବା କରୁଥିବା ଅଭିଯୋଗ ହେଉଛି। ସୂଚନା ଅନୁଯାୟୀ କିଛି ବର୍ଷ ହେବ ରେଳଧାରଣା ନିର୍ମାଣ କାର୍ୟ୍ୟ ତଥା ହରିଶଙ୍କର ରୋଡ୍ ରେଳ ଷ୍ଟେସନର ଉନ୍ନତି କରଣ କାମ ଚାଲିଥିବାରୁ ଯାନ ବାହାନ ଯିବା ଆସିବାରୁ ଲାଠୋର ବସଷ୍ଟାଣ୍ଡରୁ ଶ୍ରୀଦୁର୍ଗେଶ୍ୱରୀ ନୋଡାଲ ବିଦ୍ୟାଳୟକୁ ଯାଇଥିବା ରାସ୍ତା ଉପରେ ମାଟି ପଡି କାଦୁଅ ହୋଇଯାଇଛି।
ଯେଉଁ ଠିକାଦାରମାନେ ଏହି କାର୍ୟ୍ୟକରୁଛନ୍ତି ସେମାନେ ରାସ୍ତା ଅବସ୍ଥାକୁ ଧ୍ୟାନ ଦେଉନାହାନ୍ତି। ଫଳରେ ନୋଡାଲ ବିଦ୍ୟାଳୟକୁ ପ୍ରତ୍ୟହ ପାଠ ପଢ଼ିଯାଉଥିବା ଶତାଧିକ ଛାତ୍ରୀଛାତ୍ର ନାନା ସମସ୍ୟାର ସମ୍ମୁଖିନ ହେବା ସହ ଛୋଟ ବଡ ଦୁର୍ଘଟଣାର ଶିକାର ସମ୍ମୁଖିନ ହେଉଥିବା ଦେଖାଯାଉଛି। ଏନେଇ ଲାଠୋର ସରପଞ୍ଚ ପ୍ରବିଣ ଅଗ୍ରୱାଲ ବାରମ୍ବାର ରେଳ ବିଭାଗ ଠିକାଦାରଙ୍କୁ ବିଦ୍ୟାଳୟ ଯିବା ଆସିବା କରୁଥିବା ପିଲାଙ୍କ ସ୍ୱାର୍ଥକୁ ଦୃଷ୍ଟିରେ ରଖି ରାସ୍ତାରେ ପଡି ରହିଥିବା କାଦୁଅ ସଫା ସହ ମରାମତି ପାଇଁ ଅନୁରୋଧ କରିଥିଲେ ମଧ୍ୟ କେହି ତାଙ୍କ କଥାକୁ କର୍ଣ୍ଣପାତ କରୁନଥିବା ସରପଞ୍ଚ ପ୍ରକାଶ କରିଛନ୍ତି।
