ନୂଆଦିଲ୍ଲୀ : ନୂଆଦିଲ୍ଲୀ ରେଳ ଷ୍ଟେସନରେ ଶୁକ୍ରବାର ଚଣ୍ଡିଗଡ଼-କୋଚୁଭାଲ୍ଲୀ ଏକ୍ସପ୍ରେସର ଇଂଜିନ (ଜେନେରଟର ଥିବା ପାୱାର କାର)ରେ ନିଆଁ ଲାଗିଯାଇଛି। ଏହାକୁ ନେଇ ସେଠାରେ ଧାଁ-ଦୌଡ଼ ପରିସ୍ଥିତି ସୃଷ୍ଟି ହୋଇଥିଲା। ରେଳଟି ପ୍ଲାଟଫର୍ମ ନମ୍ବର ୮ରୁ ପ୍ରସ୍ଥାନ କରୁଥିବା ସମୟରେ ଇଂଜିନରେ ନିଆଁ ଲାଗିଯାଇଥିଲା। ତେବେ ଯାତ୍ରୀମାନେ ସୁରକ୍ଷିତ ଥିବା ଜଣାପଡିଛି।
ସୂଚନା ଅନୁସାରେ ଶୁକ୍ରବାର ଅପରାହ୍ଣରେ ଟ୍ରେନ ନମ୍ବର ୨୨୧୮ ଚଣ୍ଡିଗଡ଼-କୋଚୁଭାଲ୍ଲୀ ଏକ୍ସପ୍ରେସ ନୂଆଦିଲ୍ଲୀ ରେଳ ଷ୍ଟେସନର ପ୍ଲାଟଫର୍ମ ନମ୍ବର ୮ରୁ ପ୍ରସ୍ତାନ ହେବାକୁ ଥିବାବେଳେ ତାର ପଛପଟ ଜେନେରେଟର କାରରେ ନିଆଁ ଲାଗିଯାଇଥିଲା। ନିଆଁ ଲାଗିଥିବା ଦେଖି ଯାତ୍ରୀମାନେ ରେଳରୁ ଓହ୍ଲାଇପଡିଥିଲେ। ହୋହଲ୍ଲା ମଧ୍ୟରେ ଧାଁ-ଦୌଡ଼ ପରିସ୍ଥିତି ସୃଷ୍ଟି ହୋଇଥିଲା। ପରେ ୧୨ଟି ଦମକଳ ଅଗ୍ନିକାଣ୍ଡସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଛନ୍ତି। ଅଗ୍ନିକାଣ୍ଡର କାରଣ ଜଣାପଡିନାହିଁ। ରେଳ ପ୍ରଶାସନ ଘଟଣାର ତଦନ୍ତ ଆରମ୍ଭ କରିଛି।
