ଗୋବିନ୍ଦପାଲ୍ଲୀ : ମାଲକାନଗିରି ଜିଲା ଖଇରପୁଟ ବ୍ଲକ ମାଡ଼କାପଦର ପଞ୍ଚାୟତ ଅନ୍ତର୍ଗତ ଗୁମ୍ମାଝରଣ ଜଳପ୍ରପାତରେ ଏକ ଅଭାବନୀୟ ଘଟଣା ଘଟିଛି। ସେଲ୍ଫି ନେବା ବେଳେ ଜଳପ୍ରପାତରେ ବୁଡ଼ି ଦୁଇଭାଇଙ୍କ ଜୀବନ ଚାଲିଯାଇଛି। ସେମାନେ ହେଲେ କୋରାପୁଟ ଜିଲା ଜୟପୁର ବାଇପାସ୍ ରୋଡ୍ ଅଞ୍ଚଳର ବଡ଼ଭାଇ ପ୍ରଦୀପ ସାହୁ ଓ ସାନଭାଇ ସନ୍ଦୀପ ସାହୁ । ସେମାନେ ପରିବାର ସହ ଉକ୍ତ ସ୍ଥାନକୁ ବଣଭୋଜି କରିବାକୁ ଆସିଥିଲେ। ଝରଣାରେ ଗାଧୋଇବା ସହ ସେଲ୍ଫି ନେବା ସମୟରେ ଅସାବଧାନତାରୁ ଦୁଇ ଜଣ ବୁଡି ଯାଇଥିଲେ। ପାଖରେ ଥିବା ପରିବାର ଲୋକେ କିଛି ଉପାୟ ନପାଇ ଚିତ୍କାର କରିଥିଲେ। ଚିତ୍କାର ଶୁଣି ନିକଟରେ ଥିବା ଗାଁ ଲୋକେ ଆସି ଦୁଇଭାଇଙ୍କୁ ଉଦ୍ଧାର କରିଥିଲେ। ଦୁଇ ଜଣଙ୍କୁ ସଙ୍ଗେ ସଙ୍ଗେ ମାଥିଲି ଉପଖଣ୍ଡ ଚିକିତ୍ସାଳୟକୁ ଅଣାଯାଇଥିଲା। ସେଠାରେ ଡାକ୍ତର ଦୁଇଭାଇଙ୍କୁ ମୃତ ଘୋଷଣା କରିଥିଲେ। ମାଥିଲି ପୁଲିସ ପହଞ୍ଚି ମୃତଦେହ ଜବତ କରିଥିଲେ। ଗୁମ୍ମାଝରଣ ଏକ ପର୍ଯ୍ୟଟନସ୍ଥଳୀ ହୋଇଥିଲେ ମଧ୍ୟ ସେଠାରେ କୌଣସି ସୁରକ୍ଷା ବ୍ୟବସ୍ଥା ନ ଥିବାରୁ ଦିନକୁ ଏପରି ଘଟଣା ବଢ଼ିବାରେ ଲାଗିଛି। ପ୍ରଶାସନ ପକ୍ଷରୁ ତୁରନ୍ତ ଏଠାରେ ସୁରକ୍ଷା ବ୍ୟବସ୍ଥା ଗ୍ରହଣ କରିବା ପାଇଁ ସାଧାରଣରେ ଦାବି ହେଉଛି।
Popular Categories
Previous article
Next article