ଦେବଗଡ଼: ଦେବଗଡ ଥାନା ଅନ୍ତର୍ଗତ ହଦମୁଣ୍ଡା ଘାଟି ନିକଟ ୫୩ନମ୍ବର ଜାତୀୟ ରାଜପଥରେ ମଙ୍ଗଳବାର ସକାଳେ ଏକ ଯାତ୍ରୀବାହୀ ବସ ଗୋଟିଏ ବାଇକକୁ ଧକ୍କାଦେବା ଫଳରେ ଜଣେ କଲେଜ ଛାତ୍ରୀଙ୍କ ସମେତ ୨ ଜଣଙ୍କର ମୃତ୍ୟୁ ଘଟିଛି। ମୃତକଦ୍ବୟ ହେଲେ ଦେବଗଡ ଥାନା ଅନ୍ତର୍ଗତ ବାଘିଆବନ୍ଧ ଗ୍ରାମର ସନ୍ତୋଷ ପ୍ରଧାନ(୨୦) ଓ ଦେବଗଡ କଲେଜରେ ଯୁକ୍ତ ୨ରେ ପଢୁଥିବା ଉକ୍ତ ଗ୍ରାମର ସୀମାରେଖା ବିଶ୍ୱାଳ। ମିଳିଥିବା ସୂଚନା ଅନୁଯାୟୀ, ସକାଳ ପ୍ରାୟ ୭ଟାରେ ଉଭୟେ ଏକ ବାଇକ ଯୋଗେ ଦେବଗଡ ଅଭିମୁଖେ ଆସୁଥିବା ବେଳେ ହଦମୁଣ୍ଡା ଘାଟି ନିକଟ ଜାତୀୟ ରାଜପଥରେ ଦେବଗଡରୁ ଅନୁଗୁଳ ଯାଉଥିବା ଏକ ଘରୋଇ ବସ୍(ନଂ-ଓଡି-୨୮-୮୧୧୮) ସେମାନଙ୍କୁ ସାମ୍ନା ପଟୁ ଧକ୍କା ଦେଇ ବାଇକ୍କୁ କିଛିଦୂର ପର୍ଯ୍ୟନ୍ତ ଘୋଷାରି ନେଇଥିଲା। ଘଟଣାସ୍ଥଳରେ ସନ୍ତୋଷଙ୍କ ମୃତ୍ୟୁ ଘଟିଥିବାବେଳେ ସୀମାରେଖା ଗୁରୁତର ଆହତ ହୋଇଥିଲେ। ସ୍ଥାନୀୟ ଲୋକେ ତାଙ୍କୁ ଉଦ୍ଧାର କରି ଚିକିତ୍ସା ନିମନ୍ତେ ଦେବଗଡ ଜିଲା ମୁଖ୍ୟ ଚିକିତ୍ସାଳୟକୁ ଆଣିଥିଲେ। ମାତ୍ର ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ। ଏହି ଘଟଣା ପ୍ରଚାରିତ ହେବାପରେ ଦେବଗଡ କଲେଜର ଛାତ୍ରଛାତ୍ରୀ ଓ ଅଧ୍ୟାପକ ଅଧ୍ୟାପିକା ମହଲରେ ଗଭୀର ଶୋକ ପ୍ରକାଶ ପାଇଛି।
Comments are closed.