କଟକ: କେନ୍ଦ୍ରୀୟ ବିଦ୍ୟାଳୟ ଛାତ୍ରଙ୍କୁ ଉପର ଶ୍ରେଣୀକୁ ପଦୋନ୍ନତି ଦିଆ ନଯିବା ପ୍ରସଙ୍ଗରେ ହାଇକୋର୍ଟ ଜଷ୍ଟିସ ଏ.କେ ରଥଙ୍କ ଖଣ୍ଡପୀଠ ବିଦ୍ୟାଳୟ ନିଷ୍ପତ୍ତିକୁ କାଏମ ରଖିବା ସହ ଏନେଇ ଆବେଦନକୁ ଖାରଜ କରିଛନ୍ତି। ତେବେ ଆବେଦନକାରୀ ପରବର୍ତ୍ତୀ ପରୀକ୍ଷାରେ ସଫଳତା ପାଇବେ ବୋଲି କୋର୍ଟ ଦର୍ଶାଇଛନ୍ତି। ମାମଲାର ବିବରଣୀରୁ ପ୍ରକାଶ ଯେ ଭୁବନେଶ୍ୱର କେନ୍ଦ୍ରୀୟ ବିଦ୍ୟାଳୟର ଜଣେ ଛାତ୍ର ଏକାଦଶ ଶ୍ରେଣୀରେ ଅର୍ଥନୀତି ବିଷୟରେ ଆଶାଜନକ ମାର୍କ ରଖି ନଥିଲେ। ୨୦୧୭-୧୮ ଶିକ୍ଷାବର୍ଷ ବାର୍ଷିକ ପରୀକ୍ଷାରେ ସମୁଦାୟ ୮୦ ମାର୍କରୁ ଛାତ୍ର ଜଣକ ୨୨ମାର୍କ ରଖିଥିଲେ। ତେବେ ଶତକଡ଼ା ୩୩ ପ୍ରତିଶତ ମାର୍କ ହାସଲ କରି ନଥିବାରୁ ତାଙ୍କୁ ଉପର ଶ୍ରେଣୀକୁ ପଦୋନ୍ନତି ଦିଆଯାଇନଥିଲା। କିନ୍ତୁ ସପ୍ଲିମେଣ୍ଟାରୀ ପରୀକ୍ଷା ଦେବାର ସୁଯୋଗ ଥିବାବେଳେ ଛାତ୍ର ଜଣକ ମଧ୍ୟ ୩୩ ପ୍ରତିଶତ ମାର୍କ ହାସଲ କରି ନଥିଲେ। ଫଳରେ ସ୍କୁଲ କର୍ତ୍ତୃପକ୍ଷ ଉପର ଶ୍ରେଣୀକୁ ପଦୋନ୍ନତି ଦେଇ ନଥିଲେ। ତେବେ ଆବେଦନକାରୀ ଜାତୀୟ ସ୍ତରୀୟ ଏକ ନୃତ୍ୟ ପ୍ରତିଯୋଗିତାରେ ଅଂଶ ଗ୍ରହଣକରି ହାସଲ କରିଥିବା ସାର୍ଟିଫିକେଟ ସ୍କୁଲରେ ପ୍ରଦାନ କରି ନିୟମ ଅନୁସାରେ ଗ୍ରେସ୍ ମାର୍କ ୪ ନମ୍ବର ଦିଆଯାଉ ବୋଲି ନିବେଦନ କରିଥିଲେ। ମାତ୍ର ସ୍କୁଲ କର୍ତ୍ତୃପକ୍ଷ ଏହାକୁ ଅଗ୍ରାହ୍ୟ କରି ଉପର ଶ୍ରେଣୀକୁ ପଦୋନ୍ନତି ଦେଇନଥିଲେ। ଏହାକୁ ଚାଲେଞ୍ଜ କରି ଆବେଦନକାରୀ ହାଇକୋର୍ଟର ଦ୍ୱାରସ୍ଥ ହୋଇଥିଲେ। କେନ୍ଦ୍ରୀୟ ବିଦ୍ୟାଳୟ ସଂଗଠନ ପକ୍ଷରୁ ଆଇନଜୀବୀ ହୃଷିକେଶ ତ୍ରିପାଠୀ ମାମଲା ପରିଚାଳନା କରୁଥିଲେ।
Popular Categories
Previous article
Next article