ଫୁଲବାଣୀ: କନ୍ଧମାଳରେ ଦିନକୁ ଦିନ ଶୀତ ପ୍ରକୋପ ବଢ଼ିବାରେ ଲାଗିଛି। ଜି.ଉଦୟଗିରିରେ ଗୁରୁବାର ସର୍ବନିମ୍ନ ତାପମାତ୍ରା ୬.୨ ଡିଗ୍ରୀ ସେଲସିୟସରେ ପହଞ୍ଚି ରାଜ୍ୟର ସବୁଠାରୁ ଥଣ୍ଡା ସହର ରହିଛି। ଫୁଲବାଣୀରେ ତାପମାତ୍ରା ୯ ଡିଗ୍ରୀ ହୋଇଥିବା ବେଳେ ଓଡ଼ିଶାର କାଶ୍ମୀର ଭାବେ ପରିଚିତ ଦାରିଙ୍ଗବାଡିରେ ମଧ୍ୟ ସର୍ବନିମ୍ନ ତାପମାତ୍ରା ୧୧ ଡିଗ୍ରୀ ଥିବା ରେକର୍ଡ କରାଯାଇଛି। ଏହି ତିନି ଅଞ୍ଚଳରେ ଆଗକୁ ତାପମାତ୍ରା ଅଧିକା କମିବା ସମ୍ଭାବନା ଥିବା ପାଣିପାଗ ବିଭାଗ ପକ୍ଷରୁ କୁହାଯାଇଛି। ଗତ ସପ୍ତାହ ହେଲା
ସମଗ୍ର ଜିଲାରେ ଅସମ୍ଭାଳ ଶୀତ ଅନୁଭୁତ ହେଉଛି। ଶୀତ ବଢ଼ୁଥିବାରୁ ଦାରିଙ୍ଗବାଡ଼ି, ଫୁଲବାଣୀ, ରାଇକିଆ ଓ ତୁମୁଡ଼ିବନ୍ଧ ଭଳି ବିଭିନ୍ନ ଅଞ୍ଚଳକୁ ପର୍ଯ୍ୟଟକଙ୍କ ଆଗମନ ଆରମ୍ଭ ହୋଇଛି। ପ୍ରଥମଥର ପାଇଁ ଦାରିଙ୍ଗବାଡ଼ିରେ ଗତ ଦୁଇଦିନ ହେଲା କିଛି ୟୁରୋପୀୟ ପର୍ଯ୍ୟଟକଙ୍କୁ ଦେଖିବାକୁ ମିଳିଛି।
ବିଦେଶୀ ପର୍ଯ୍ୟଟକମାନେ ବିଭିନ୍ନ ପର୍ଯ୍ୟଟନସ୍ଥଳୀ ବୁଲିବା ସହିତ ଦାରିଙ୍ଗବାଡ଼ି ସ୍ଥିତ କସମ୍ରୁ ହଳଦୀ ଓ ଅନ୍ୟ କେତେକ ସାମଗ୍ରୀ ମଧ୍ୟ କ୍ରୟ କରିଛନ୍ତି। ସନ୍ଧ୍ୟା ହେଲେ ଲୋକେ ନିଆଁ ଚାରିପାଖରେ ବସୁଥିବା ପରିଲକ୍ଷିତ ହେଉଛି। ଜିଲାର ଅଧିକାଂଶ ଅଞ୍ଚଳରେ ପ୍ରଶାସନ ପକ୍ଷରୁ ବର୍ତ୍ତମାନ ସୁଦ୍ଧା ଶୀତ ଆଶ୍ରୟସ୍ଥଳୀ ଖୋଲା ଯାଇନଥିବା ଅଭିଯୋଗ ହୋଇଛି। ରାତିରେ କୁହୁଡ଼ି ଯୋଗୁଁ ଯାନବାହାନ ଚଳାଚଳରେ ଅସୁବିଧା ସୃଷ୍ଟି ହେଉଥିବା ଚାଳକମାନେ କହିଛନ୍ତି।
