ନୂଆଦିଲ୍ଲୀ: ୩୧ ବର୍ଷ ପରେ ଜ୍ଞାନବାପିରେ ହିନ୍ଦୁପକ୍ଷ ପୂଜା କରିଛନ୍ତି। କୋର୍ଟଙ୍କ ନିର୍ଦ୍ଦେଶର ୨୪ଘଣ୍ଟା ମଧ୍ୟରେ ବାରଣାସୀ ଜିଲା ପ୍ରଶାସନ ବ୍ୟାରିକେଢ ହଟାଇ ରାତି ୨ଟା ସମୟରେ ପ୍ରଥମ ପୂଜା କରାଯାଇଥିଲା। ଏହାପରେ ଗୁରୁବାର ସକାଳେ ମଙ୍ଗଳ ଆଳତି ମଧ୍ୟ କରାଯାଇଛି। ପୂଜା ଆରମ୍ଭ ହେବା ପରେ ସକାଳୁ ଭକ୍ତଙ୍କ ମଧ୍ୟରେ ଉତ୍ସାହ ଦେଖିବାକୁ ମିଳିଛି।
ଗୁରୁବାର ସକାଳେ ଜ୍ଞାନବାପି ଗେଟ୍ ନଂ ୪ରେ ସୁରକ୍ଷା ବ୍ୟବସ୍ଥା କଡାକଡି କରାଯାଇଛି। ଶାନ୍ତି ଶୃଙ୍ଖଳା ବଜାୟ ରଖିବା ପାଇଁ ଫୋର୍ସ ମୁତୟନ କରାଯାଇଛି। ପୂଜାର୍ଚ୍ଚନା କରାଯାଉଥିବାରୁ ସେଠାରେ ଥିବା ପୁରୋହିତଙ୍କ ମଧ୍ୟରେ ବହୁତ ଉତ୍ସାହ ଦେଖିବାକୁ ମିଳିଛି। ଜଣେ ପୂଜକ କହିଛନ୍ତି ୩୧ବର୍ଷ ପୂର୍ବେ ସେଠାରେ ଥିବା କଳା ଚାଦର ହଟାଇ ଦିଆଯାଇଛି। ଶ୍ରଦ୍ଧାଳୁ ମାନେ ପ୍ରଥମେ ବାବା ବିଶ୍ୱନାଥଙ୍କ ଦର୍ଶନ କରିଛନ୍ତି।
ସୂଚନା ଅନୁସାୟୀ ୧୯୯୧ରେ ତତ୍କାଳୀନ ମୁଲାୟମ ସିଂ ସରକାରଙ୍କ ନିର୍ଦ୍ଦେଶରେ ଭାୟାଜୀଙ୍କ ବେସମେଣ୍ଟରେ ପୂଜା ବନ୍ଦ କରାଯାଇ ସେଠାରେ ଲୁହା ବ୍ୟାରିକେଡ ରଖାଯାଇଥିଲା। ଏହା ପରେ ହିନ୍ଦୁମାନଙ୍କ ମଧ୍ୟରେ କ୍ଷୋଭ ପ୍ରକାଶ ପାଇଥିଲା। କିନ୍ତୁ ଦୀର୍ଘ ଦିନର ଆଇନଗତ ଯୁଦ୍ଧ ପରେ ବାରଣାସୀ ଜିଲା କୋର୍ଟ ଭାୟାଜିଙ୍କ ବେସମେଣ୍ଟ ଖୋଲି ପୂଜା କରିବା ପାଇଁ ନିର୍ଦ୍ଦେଶ ଦେଇଥିଲେ। ଅନ୍ୟପଟେ କୋର୍ଟଙ୍କ ନିର୍ଦ୍ଦେଶକୁ ନେଇ ମୁସଲିମ ପକ୍ଷ ଅସନ୍ତୁଷ୍ଟ ଥିବା ଜଣାପଡିଛି। ଜିଲା ଜର୍ଜଙ୍କ ନିଷ୍ପତିକୁ ନେଇ ମୁସଲିମ ପକ୍ଷ ଗୁରୁବାର ହାଇକୋର୍ଟରେ ଚ୍ୟାଲେଞ୍ଜ କରିବେ।
