କିଭ୍: ଥମୁନି ରୁଷ୍-ୟୁକ୍ରେନ୍ ଯୁଦ୍ଧ । ମାସ ମାସ ଧରି ଉଭୟଙ୍କ ମଧ୍ୟରେ ଘମାଘୋଟ ଲଢ଼େଇ ଜାରି ରହିଛି । ରୁଷର ଆକ୍ରମଣରେ ଖିନଭିନ୍ ହେଉଛି ୟୁକ୍ରେନ୍ ମାଟି । ଯୁଦ୍ଧ ଯୋଗୁଁ ଉଭୟ ଦେଶର ଅନେକ ସୈନିକ ଓ ସାଧାରଣ ଲୋକଙ୍କ ଜୀବନ ଯାଉଛି । ଆଜି ପୁଣି ରୁଷର ଆକ୍ରମଣରେ ୟୁକ୍ରେନର ୨୫ଜଣଙ୍କ ମୃତ୍ୟୁ ହୋଇଛି । ୟୁକ୍ରେନର ଜାପୋରିଝଝିଆରେ ରୁଷିଆ ରକେଟ୍ ଓ ମିଜାଇଲ୍ ମାଡ଼ କରିବା ଦ୍ୱାରା ୨୫ଜଣଙ୍କ ମୃତ୍ୟୁ ହୋଇଥିବା ଜଣାପଡ଼ିଛି । ଖାଲି ସେତିକି ନୁହେଁ ଗତକାଲି ୟୁକ୍ରେନର ୪ଟି ସହରକୁ ନିଜ ଅଧିନକୁ ନେଇଛି ରୁଷ ।
ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ଘୋଷଣା ଅନୁଯାୟୀ ୟୁକ୍ରେନର ଡୋନେସ୍କ, ଲୁହାନ୍ସ, ଖେରସୋନ ଓ ଜାପୋରିଝାଝିଆ ଅଞ୍ଚଳ ରୁଷ୍ ଭୂଖଣ୍ଡର ଅନ୍ତର୍ଭୁକ୍ତ ହୋଇଛି। ୟୁକ୍ରେନର ଅଞ୍ଚଳକୁ ନିଜ ଦଖଲକୁ ନେବା ପରେ ପୁଟିନ କହିଛନ୍ତି ଯେ ରୁଷ୍ ନିଜ ଭୂଖଣ୍ଡର ସୁରକ୍ଷା ନିମନ୍ତେ ପୂର୍ଣ୍ଣ ଶକ୍ତି ସହିତ ଲଢେଇ କରିବ। ଶୁକ୍ରବାର ପୁଟିନଙ୍କ ଏହି ଘୋଷଣା ରୁଷ୍-ୟୁକ୍ରେନ ଯୁଦ୍ଧର ଭୟାବହତା ବଢିବାର ସୂଚନା ମିଳିଛି।
ପରମାଣୁ ଆକ୍ରମଣ କରିବାକୁ ଧମକ ଦେଇ ଆସୁଥିବା ପୁଟିନଙ୍କ ନିଷ୍ପତ୍ତିକୁ ନେଇ ବିଶ୍ବବାସୀ ଭୟଭୀତ ହୋଇପଡିଛନ୍ତି । ସେପଟେ ୟୁକ୍ରେନର ୪ ସହରକୁ ରୁଷ୍ ଭୂଖଣ୍ଡର ଅନ୍ତର୍ଭୁକ୍ତ କରିବା ପ୍ରସଙ୍ଗକୁ ନେଇ ୟୁଏନଏସସି ପକ୍ଷରୁ ନିନ୍ଦା କରାଯାଇଛି । ଆମେରିକା ଓ ଆଲବେନିଆ ପକ୍ଷରୁ ୟୁଏନଏସସିରେ ନିନ୍ଦା ପ୍ରସ୍ତାବ ଅଣାଯାଇଛି । ହେଲେ ଏଥି ଭୋଟିଂରୁ ଭାରତ ବିରତ ରହିଥିବା ବେଳେ, ବ୍ରାଜିଲ, ଚୀନ ଓ କାବୋନ ମଧ୍ୟ ନିଜର ମତ ରଖିନାହାନ୍ତି ।
