ଆଜି ବ୍ୟବସାୟୀ ସଂଘ ପକ୍ଷରୁ ଦେଶବ୍ୟାପୀ ବନ୍ଦ ପାଳନ, ଅପରାହ୍ନ ୪ଟା ଯାଏ ଖୋଲିବନି ଦୋକାନବଜାର

ଭୁବନେଶ୍ଵର: ପୁଲୱାମାରେ ଆତଙ୍କବାଦୀ ଆକ୍ରମଣରେ ୪୦ ଯବାନ ଶହୀଦ ହେବା ଘଟଣାର ପ୍ରତିବାଦ କରିବା ସହ ଯବାନମାନଙ୍କୁ ଶ୍ରଦ୍ଧାଞ୍ଜଳି ଜଣାଇବା ଉଦ୍ଦେଶ୍ୟରେ ଆଜି ଦେଶବ୍ୟାପୀ ବ୍ୟବସାୟୀମାନଙ୍କ ପକ୍ଷରୁ ବନ୍ଦ ପାଳନ କରାଯାଉଛି। ଅଖିଳ ଭାରତୀୟ ବ୍ୟବସାୟୀ ସଂଘ ପକ୍ଷରୁ ଦିଆଯାଇଥିବା ଏହି ବନ୍ଦ ଡାକରାରେ ଓଡ଼ିଶାର ବିଭିନ୍ନ ବ୍ୟବସାୟୀ ସଂଗଠନଗୁଡ଼ିକ ସାମିଲ ହୋଇଛନ୍ତି। ସକାଳୁ ରାଜ୍ୟର ବିଭିନ୍ନ ସ୍ଥାନରେ ଦୋକାନବଜାର ଏବଂ ପେଟ୍ରୋଲ ପମ୍ପ ବନ୍ଦ ରହିଛି। ଅପରାହ୍ନ ୪ଟା ପର୍ଯ୍ୟନ୍ତ କୌଣସି ଦୋକାନବଜାର ଖୋଲିବ ନାହିଁ ବୋଲି ସଂଗଠନଗୁଡ଼ିକ ପକ୍ଷରୁ ନିଷ୍ପତ୍ତି ନିଆଯାଇଛି। ତେବେ ଔଷଧ ଦୋକାନଗୁଡ଼ିକ ଖୋଲା ରହିବ ବୋଲି ସୂଚନା ମିଳିଛି।

କଟକ ମାଲଗୋଦାମ, ଛତ୍ରବଜାର ଏବଂ ଅନ୍ୟାନ୍ୟ ଅଞ୍ଚଳରେ ବନ୍ଦ ପାଳନ କରାଯାଇଛି। ବ୍ୟବସାୟୀମାନେ ଏକତ୍ର ହୋଇ ଆକ୍ରମଣ ଘଟଣାକୁ ନିନ୍ଦା କରିବା ସହ ଦୋକାନବଜାର ବନ୍ଦ ରଖିଛନ୍ତି। ସକାଳୁ ସକାଳୁ ରାଜଧାନୀ ଭୁବନେଶ୍ଵରରେ ମଧ୍ୟ ଅଧିକାଂଶ ସ୍ଥାନରେ ବ୍ୟବସାୟିକ ପ୍ରତିଷ୍ଠାନ ଏବଂ ଦୋକାନବଜାର ବନ୍ଦ ରହିଥିବା ଦେଖାଯାଇଛି।