ଗୋପାଳପୁର: ଗଞ୍ଜେଇ ଚାଲାଣ ବେଳେ ଗୋପାଳପୁର ପୁଲିସର ଏକ ଟିମ ଅଭିଯୁକ୍ତମାନଙ୍କୁ କାବୁ କରିବା ସହ ଗଞ୍ଜେଇ ଜବତ କରିଛି। ପୁଲିସ ପକ୍ଷରୁ ଆମ୍ବପୁଆସ୍ଥିତ ଆୟକର ବିଭାଗ ଅଫିସ ନିକଟ ରାସ୍ତାରୁ ଏକ କାରରୁ ଗଞ୍ଜେଇ ଜବତ କରି ୩ଜଣକୁ ଅଟକ ରଖିଥିବା ଜଣାପଡିଛି। ଏକ ବିଶ୍ବସ୍ତ ସୂତ୍ରରୁ ଖବରପାଇ ଗୋପାଳପୁର ପୁଲିସ ଶନିବାର ସନ୍ଧ୍ୟାରେ ପାଟ୍ରୋଲିଂ ବେଳେ ଆମ୍ବପୁଆସ୍ଥିତ ଆୟକର ଭବନ ଅଫିସ ନିକଟରେ ଦ୍ରୁତ ଗତିରେ ଆସୁଥିବା ଏକ ଧଳାରଙ୍ଗର କାରକୁ ଅଟକାଇଥିଲେ। କିନ୍ତୁ କାରଟି ନ ଅଟକି ଖସିଯିବାକୁ ଉଦ୍ୟମ କରିଥିଲା। ପୁଲିସ ତାକୁ ପିଛା କରିବା ସହ ଅଟକାଇ ଯାଞ୍ଚ କରିଥିଲା। ଯାଞ୍ଚ ବେଳେ କାରରୁ ୪୪ କେଜି ଗଞ୍ଜେଇ ମିଳିଥିଲା। ଗାଡ଼ିରେ ଥିବା ୩ ଜଣଙ୍କୁ ପୁଲିସ ଥାନାକୁ ଆଣି ଅଟକ ରଖିଥିଲା। ଅଭିଯୁକ୍ତମାନେ ଅଙ୍ଗରଗାଁରୁ ଗଞ୍ଜେଇକୁ ନେଇ ବ୍ରହ୍ମପୁରରୁ ଟ୍ରେନ ଯୋଗେ ବିଶାଖାପାଟଣା ଚାଲାଣ କରିବାକୁ ଯୋଜନା କରୁଥିବା ଥାନା ଅଧିକାରୀ ପ୍ରଶାନ୍ତ କୁମାର ମଲ୍ଲିକ ସୂଚନା ଦେଇଛନ୍ତି।
Comments are closed.