୪ କଲରା ପତରିଆ ବାଘ ଛାଲ ଜବତ; ୩ ଗିରଫ

ଖୁଣ୍ଟା: ମୟୁରଭଞ୍ଜ ଜିଲା ଖୁଣ୍ଟା ବ୍ଲକ ତଥା ବାରିପଦା ବନାଞ୍ଚଳର ଡୁକୁରା ବିଟ୍ ଅଧୀନ ବାହଳଦା ଗ୍ରାମରେ ରବିବାର ବନ ବିଭାଗ ଚଢାଉ କରି ଏକ କାଳୀନ ୪ କଲରାପତରିଆ ବାଘ ଛାଲ ଜବତ କରିଛି । ଏଥିସହ ଏହି ମାମଲାରେ ୩ ଜଣ ଅଭିଯୁକ୍ତକୁ ଗିରଫ କରାଯାଇଛି ଓ ସେମାନଙ୍କ ନିକଟରୁ ୩ଟି ମୋବାଇଲ୍‌ ଫୋନ୍‌ ଜବତ କରାଯାଇଛି। ବାରିପଦା ବନଖଣ୍ଡ ଅଧିକାରୀ ସନ୍ତୋଷ ଯୋଶୀ ଓ ଶିମିଳିପାଳ ବ୍ୟାଘ୍ର ପ୍ରକଳ୍ପ(ଏସଟିଆର) ଡେପୁଟି ନିର୍ଦେଶକ(ଦକ୍ଷିଣ) ସମ୍ରାଟ ଗୌଡାଙ୍କ ନେତୃତ୍ୱରେ ବାରିପଦା ଓ ରାଇରଙ୍ଗପୁର ବନଖଣ୍ଡ, ଉତ୍ତର ଓ ଦକ୍ଷିଣ ଏସଟିଆରର ବନ କର୍ମଚାରୀମାନେ ଚଢ଼ଉରେ ସାମିଲ ହୋଇଥିଲେ। ଶିମିଳିପାଳ ଅଭୟାରଣ୍ୟ ସଂଲଗ୍ନ ବହଳଦା ଗ୍ରାମରୁ ଏକକାଳୀନ ୪ଟି କଲରାପତରିଆ ବାଘଛାଲ ମିଳିବା ଚିନ୍ତାର କାରଣ ହୋଇଥିବା ବେଳେ ତଦନ୍ତ ପାଇଁ ଅଭିଯୁକ୍ତଙ୍କ ବାବଦରେ ବିଭାଗ ଅଧିକ ତଥ୍ୟ ପ୍ରକାଶ କରିନାହିଁ। ବାଘଛାଲଗୁଡିକୁ ବାରିପଦା ନିଆଯାଇଛି।