ମୁମ୍ବଇ : କରୀନା କପୁର ଓ ସୈଫ୍ ଅଲ୍ଲୀ ଖାନଙ୍କ ପୁଅ ତୈମୁର ଅଲ୍ଲୀ ଖାନ୍ ବଲିଉଡରେ ପାଦ ଥାପିସାରିଛନ୍ତି। ମାତ୍ର ୨ ବର୍ଷୀୟ ତୈମୁରଙ୍କୁ ଖୁବଶୀଘ୍ର ମାଆ କରୀନାଙ୍କ ଅଭିନୀତ ଆଗାମୀ ଚଳଚ୍ଚିତ୍ର ‘ଗୁଡ୍ ନ୍ୟୁଜ୍’ରେ ଦେଖିବାକୁ ମିଳିବ। ଏଥିରେ ତାଙ୍କୁ ୧୦ ମିନିଟ୍ ପାଇଁ ଦେଖିବାକୁ ମିଳିବ। ଅର୍ଥାତ୍ ସେ ଏଥିରେ ଅତିଥି କଳାକାର ଭାବେ ଅଭିନୟ କରିଛନ୍ତି। ଚଳଚ୍ଚିତ୍ର ପାଇଁ ନିଜର ୨ଟି ସିନ୍ ତୈମୁର ଶୁଟ୍ କରି ସାରିଛନ୍ତି। ଏହି ଚଳଚ୍ଚିତ୍ରରେ କରୀନାଙ୍କ ବ୍ୟତୀତ ଅକ୍ଷୟ କୁମାର, କିଆରା ଆଡ଼ଭାନୀ ଓ ଦିଲଜୀତ ଦୋସାଂଝଙ୍କୁ ଦେଖିବାକୁ ମିଳିବ।
ତେବେ କିଛିଦିନ ପୂର୍ବରୁ ଚଳଚ୍ଚିତ୍ରର ଶୁଟିଂ ସେଟରୁ କିଆରା ଓ ତୈମୁରଙ୍କ ଭିଡିଓ ଭାଇରାଲ୍ ହୋଇଥିଲା। ସେତେବେଳେ ଏହାକୁ ଦେଖି ଲାଗୁଥିଲା ଯେ ତୈମୁର ଶୁଟିଂ ସେଟରେ କରୀନାଙ୍କୁ ଭେଟିବା ପାଇଁ ଯାଇଥିଲେ, ହେଲେ ଏବେ ଜଣାପଡ଼ିଛି ଯେ ସେହି ସମୟରେ ସେ ତାଙ୍କ ସିନ୍ ଶୁଟ୍ କରିବାକୁ ସେଠାରେ ପହଞ୍ଚିଥିଲେ।
ତୈମୁରଙ୍କ ବଲିଉଡ଼ ଏଣ୍ଟ୍ରିକୁ ନେଇ ପିତା ସୈଫ୍ ନିଜକୁ ଗର୍ବିତ ବୋଲି କହିଛନ୍ତି। ତୈମୁର ଖୁବକମ୍ ବୟସରୁ ସୁପରଷ୍ଟାର ପାଲଟି ଯାଇଛନ୍ତି। ତୈମୁରଙ୍କ ଫଟୋ ଓ ଭିଡିଓର ଖୁବ୍ ଚାହିଦା ମଧ୍ୟ ରହିଛି। ମିଡିଆ କମ୍ପାନୀମାନେ ତାଙ୍କର ଫଟୋ କିଣିବା ଆରମ୍ଭ କରିଛନ୍ତି। ଗୋଟିଏ ଫଟୋ ପିଛା ୧୫୦୦ଟଙ୍କା ଦେଇ ମିଡିଆ କମ୍ପାନୀମାନେ ତୈମୁରଙ୍କ ଫଟୋ କିଣୁଥିବା ଜଣାପଡିଛି।
ଉଲ୍ଲେଖଯୋଗ୍ୟ, ‘ଗୁଡ୍ ନ୍ୟୁଜ୍’ରେ କରୀନାଙ୍କୁ ପ୍ରଥମ ଥର ପାଇଁ ପୁଲିସ ଭୂମିକାରେ ଦେଖିବାକୁ ମିଳିବ।
