ସୁଆଣ୍ଡୋ : ପୁରୀ ଜିଲାର ବୈଷ୍ଣବ କ୍ଷେତ୍ର ଭାବେ ବେଶ ଜଣାଶୁଣା ସାକ୍ଷୀଗୋପାଳ ମନ୍ଦିରରେ ସାକ୍ଷୀଗୋପିନାଥ ଦେବଙ୍କୁ ଦୋଳପୂର୍ଣ୍ଣିମା ଦିନ ଦୋଳବେଦୀରେ ଦୋଳଗୋବିନ୍ଦଙ୍କୁ ଦର୍ଶନ କଲେ ଶ୍ରଦ୍ଧାଳୁ । ରାଧାକୃଷ୍ଣଙ୍କ ଦୋଳଯାତ୍ରା ଅତ୍ୟନ୍ତ ଦୁଲ୍ଲଭ ଏବଂ ଏହି ସମୟରେ ଦର୍ଶନ କଲେ ପୂଣ୍ୟ ଲାଭ ହୋଇଥାଏ ବୋଲି ମାନ୍ୟତା ରହିଛି । ଠାକୁର ଫଗୁ ଦଶମୀଠାରୁ ୫ଦିନ ଚାଚେରୀ ଭୋଗଲାଗି ପାଇଁ ସ୍ଥାନୀୟ ଗ୍ରାମମାନକୁ ପରିକ୍ରମା କରିଥିଲେ । ଦୋଳପୂର୍ଣ୍ଣମୀ ପୂର୍ବ ଦିନ ରାତିରେ ଠାକୁର ନଗର ପରିକ୍ରମା କରିବା ପରେ ଅଇଘରା ନିକଟରେ ପୂଜକ ହୋମ, ପ୍ରସାଦଲାଗି, ଶିତଳଭୋଗ ଓ ଆଲଟ ଚାମର କରାଯାଇଥିଲା । ଏହାପରେ ଅଇଘରେ ଅଗ୍ନି ସଂଯୋଗ କରାଯାଇ ମେଣ୍ଢା ପୋଡି ବା ଅଗ୍ନିଉତ୍ସବ ନିତି ଆରମ୍ଭ ହୋଇ ଠାକୁର ସାତ ଘେରା ପ୍ରଦକ୍ଷିଣ କରିଥିଲେ। ଏହାପରେ ଦୋଳବେଦୀ ସ୍ପର୍ଶ କରି ଠାକୁର ମନ୍ଦିରକୁ ଯାଇଥିଲେ । ମନ୍ଦିରରେ ଦୈନଦିନ ନୀତିକାନ୍ତି ସରିବା ପରେ ସେବାୟତ ମାନେ ଚଳନ୍ତି ପ୍ରତିମା ମଦନମୋହନଙ୍କୁ ଦୋଳବେଦୀକୁ ବିଜେ କରାଇଥିଲେ । ଭକ୍ତ ମାନଙ୍କୁ ମଦନମୋହନ ଦୋଳିରେ ଝୁଲି ଦୋଳଗୋବିନ୍ଦ ଭାବରେ ଦର୍ଶନ ଦେଇଥିଲେ ।
ଦୋଳବେଦୀରେ ଠାକୁରଙ୍କ ତିନି ଧୂପ କରାଯାଇଥିଲା । ସାକ୍ଷୀ ଗୋପୀନାଥ ମନ୍ଦିରରେ ରାଜବେଶ ହୋଇଥିଲେ । ଭକ୍ତ ମାନେ ଠାକୁରଙ୍କୁ ଫୁଲ, ଫଗୁ, ଚଣା, ଖଇ, କୋରା ଓ ସାକର ଭୋଗ କରିଥିଲେ । ସଧ୍ୟାରେ ଦୋଳବେଦୀରେ ନୂତନ ବର୍ଷର ପାଞ୍ଜି ଗଣକଙ୍କ ଦ୍ବାରା ପାଠ କରାଯାଇଥିଲା। ବିଳମ୍ବିତ ରାତିରେ ଠାକୁର ମନ୍ଦିରକୁ ଯାଇ ପହୁଡ଼ ହୋଇଥିଲେ ବୋଲି ମନ୍ଦିର ସୁପରଭାଇଜର ବିଶ୍ୱନାଥ ମହାପାତ୍ରଙ୍କ ଠାରୁ ସୁଚନା ମିଳିଛି । ସେହିପରି ସୁଆଣ୍ଡୋରେ ବିନୋଦ ବିହାରୀ ଦେବ, ଶ୍ରୀରାମଚନ୍ଦ୍ର ପୁର ଗୋପିନାଥ, ଆଦ୍ୟ ଶସନ ବୀର ରାମଚନ୍ଦ୍ରପୁର, ବୀର ଗୋବିନ୍ଦପୁର, ବିଶ୍ୱନାଥ ପୁର ଗୋପିନାଥଙ୍କ, ବରାଳ ବାଲୁଙ୍କେଶ୍ୱର, ପରଜାପଡା ଚନ୍ଦ୍ରଶେଖର ପ୍ରମୁଖ ଠାକୁରଙ୍କ ସହିତ ପୁରପଲ୍ଲୀରେ ଥିବା ମଠ ଓ ଭାଗବତ ଗାଦି ପୀଠ ମାନଙ୍କରେ ଦୋଳଯାତ୍ରା ମହାସମାରୋହରେ ପାଳିତ ହୋଇଯାଇଛି । ଠାକୁରଙ୍କୁ ଭକ୍ତମାନେ ଫଗୁ ଲାଗି କରିଥିଲେ। ଗ୍ରାମଗୁଡ଼ିକ ଦୋଳପୂର୍ଣ୍ଣିମା ଅବସରରେ ଉତ୍ସବମୁଖର ହୋଇଉଠିଥିଲା ।
Comments are closed.