ସମ୍ବଲପୁର: ଅବକାରୀ ବିଭାଗର ଗୁଇନ୍ଦା ଦଳ ପକ୍ଷରୁ ନିୟମିତ ଯାଞ୍ଚ ଅଭିଯାନ ସମୟରେ ଶନିବାର ଗୋଟିଏ କାର ସମେତ ଗଞ୍ଜେଇ ଜବତ କରାଯାଇଛି। ଅବକାରୀ ଗୁଇନ୍ଦା ବିଭାଗର ସୂଚନାନୁଯାୟୀ, ସକାଳ ପ୍ରାୟ ୭ଟା ସମୟରେ ଯାଞ୍ଚ ସମୟରେ ଅଇଁଠାପାଲି ଛକ ଠାରେ ଏକ ସନ୍ଦିଗ୍ଧ ଦାମିକୀଆ ଟୟୋଟା ଇଟିଓସ କାରକୁ ଅବକାରୀ ଦଳ ଅଟକାଇଥିଲେ। ଉକ୍ତ ଗାଡିକୁ ଯାଞ୍ଚ ସମୟରେ ଗୁପ୍ତ ଚାମ୍ବରରେ ଲୁକ୍କାୟିତ ଭାବରେ ରଖାଯାଇ ଥିବା ୨ଟି ଜରି ବସ୍ତା ମଧ୍ୟରୁ ସମୁଦାୟ ୫୦ କିଗ୍ରା ଗଞ୍ଜେଇ ଜବତ କରାଯାଇଥିଲା।
କାର ଯୋଗେ ବେଆଇନ ଭାବରେ ଗଞ୍ଜେଇ ଚାଲାଣ ଅଭିଯୋଗରେ ଝାରଖଣ୍ଡ ରାଜ୍ୟର ରାମଗଡ ଜିଲା ନିବାସୀ ହେମନ୍ତ କୁମାର ଚୌଧୁରୀ (୩୮) ଓ ଓଡିଶାର ବୌଦ୍ଧ ଜିଲା ନିବାସୀ ସୁଶାନ୍ତ ମଲ୍ଲିକ (୩୧) ଙ୍କୁ ଅବକାରୀ ପୁଲିସ ଗିରଫ କରିଛି। ସେମାନଙ୍କ ନିକଟରୁ ଅବକାରୀ ପୁଲିସ ନଗଦ ୮ ହଜାର ଟଙ୍କା, କାର ଓ ଅନ୍ୟାନ୍ୟ ସାମଗ୍ରୀ ଜବତ କରିଛି। ଏହି ଗଞ୍ଜେଇ ଗୁଡିକୁ ଅବୈଧ୍ୟ ଭାବରେ ଚାଲାଣକାରୀମାନେ ବଲାଙ୍ଗୀର ଜିଲାରୁ ଝାରଖଣ୍ଡ ରାଜ୍ୟକୁ ଚାଲାଣ କରୁଥିଲେ। ଜବତ ହୋଇଥିବା ଗଞ୍ଜେଇ, ଗାଡି ଓ ଅନ୍ୟାନ୍ୟ ସମାଗ୍ରୀ ଗୁଡିକର ଆନୁମାନିକ ମୂଲ୍ୟ ୧୦ ଲକ୍ଷ ଟଙ୍କାରୁ ଉର୍ଦ୍ଧ ହେବ।
ଏ ସମ୍ପର୍କରେ ଏକ ମାମଲା ରୁଜୁ କରାଯାଇ ଅଭିଯୁକ୍ତମାନଙ୍କୁ କୋର୍ଟ ଚାଲାଣ କରାଯାଇଛି ବୋଲି ଡିଏସପି ବିପ୍ର ଚରଣ ମଣ୍ଡଳ କହିଛନ୍ତି। ନିୟମିତ ଚାଲୁଥିବା ଏଭଳି ଚଢ଼ଉ ଓ ଯାଞ୍ଚ ଅଭିଯାନ ଆଗକୁ ମଧ୍ୟ ବଳବତ୍ତର ରହିବ ବୋଲି ବିଭାଗ ତରଫରୁ ସୂଚନା ଦିଆଯାଇଛି।
