ଭଦ୍ରକ: ପ୍ରସିଦ୍ଧ ଶୈବକ୍ଷେତ୍ର ଆରଡିଧାମର ବାବା ଆଖଣ୍ଡଳମଣିଙ୍କ ମନ୍ଦିରରେ ଜୁନ ୭ରେ ବୈଦିକ ରୀତିନୀତି ଅନୁଯାୟୀ ସମ୍ପୁର୍ଣ୍ଣ ଲୋକାଚାରରେ ଶିବବିବାହ ଉତ୍ସବ ଅନୁଷ୍ଠିତ ହେବ। ଏଥିପାଇଁ ପବିତ୍ର ଅକ୍ଷୟତୃତୀୟା ତିଥିରେ ଦିନବାର ଠିକ୍ ହେବା ପରେ ବରପିତା ଓ କନ୍ୟାପିତା ନିମନ୍ତେ ଚୟନ ପ୍ରକ୍ରିୟା ଆରମ୍ଭ କରିଛନ୍ତି ସେବାକାରୀ। ଏହି ବିବାହ ଉତ୍ସବରେ ପୀଠରେ ଲକ୍ଷାଧିକ ଭକ୍ତଙ୍କ ସମାଗମକୁ ଦୃଷ୍ଟିରେ ରଖି ଜିଲା ପ୍ରଶାସନ ପକ୍ଷରୁ ବୁଧବାରଦିନ ପ୍ରସ୍ତୁତି ବୈଠକ ହେବ। ବୈଠକରେ ମନ୍ଦିର ସେବାୟତଙ୍କ ସହ ଜିଲା ପ୍ରଶାସନ, ମନ୍ଦିର ପ୍ରଶାସନ, ଜିଲାର ବିଭିନ୍ନ ବିଭାଗର ଅଧିକାରୀ ଓ ପୁଲିସ ବିଭାଗ ଯୋଗ ଦେବାର କାର୍ଯ୍ୟକ୍ରମ ରହିଛି।
ବରପିତା ଓ କନ୍ୟାପିତା ଚୟନ ହେବା ପରେ ଲଗ୍ନ ଚିଟାଉ ନିମନ୍ତେ ଜ୍ୟୋତିଷଙ୍କ ପକ୍ଷରୁ ଦିନ ଧାର୍ଯ୍ୟ କରାଯିବ ବୋଲି ଜଣାପଡିଛି। ଚଳିତବର୍ଷ ବିବାହ ଉତ୍ସବକୁ ମହା ଆଡମ୍ବର ସହ ପାଳନ ନିମନ୍ତେ ମନ୍ଦିର ପ୍ରଶାସନ ଓ ସେବାୟତଙ୍କ ପକ୍ଷରୁ ପ୍ରସ୍ତୁତି ଆରମ୍ଭ ହୋଇଥିବା ମନ୍ଦିର ପରିଚାଳକ କହିଛନ୍ତି।
