-ଆତଙ୍କବାଦୀଙ୍କ ସହିତ ସଂଘର୍ଷ ପାଇଁ କାଶ୍ମୀରରେ ସୁରକ୍ଷା ବାହିନୀ ମୁତୟନ
-ଆତଙ୍କବାଦୀ ଗୋଷ୍ଠୀ ଜୖସେ-ଇ-ମହମ୍ମଦ ସ୍ଥାନୀୟ କାଶ୍ମୀର ଯୁବକଙ୍କୁ ନେଇ ବୋମା ବିସ୍ଫୋରଣ କରିବାର ଯୋଜନା
ନୂଆଦିଲ୍ଲୀ : ଆତଙ୍କବାଦୀ ସଂଗଠନ ଜୖସେ-ଇ-ମହମ୍ମଦ କାଶ୍ମୀରରେ ବୋମା ବିସ୍ଫୋରଣ ମାଧ୍ୟମରେ ସୁରକ୍ଷାକର୍ମୀଙ୍କ ଉପରେ ଆତଙ୍କବାଦୀ ଆକ୍ରମଣର ଧମକ ଦେବା ପରେ କାଶ୍ମୀର ଉପତ୍ୟକାରେ ସିଆପିଏଫ ଏବଂ ସେନାକୁ ହାଇ ଆଲର୍ଟ କରି ଦିଆଯାଇଛି ।
ସୋମବାର ସେନା ଓ ଅର୍ଦ୍ଧ ସାମରିକ ବାହିନୀ ଉପରେ ପାକ ସମର୍ଥିତ ଆତଙ୍କବାଦୀ ସଂଗଠନ ଜୖସେ-ଇ-ମହମ୍ମଦ ଆକ୍ରମଣ କରିବାକୁ ଯୋଜନା କରୁଥିବା ନେଇ ଗୁଇନ୍ଦା ସୂଚନା ମିଳିଛି । କାର ବୋମା କିମ୍ବା ଆତ୍ମଘାତୀ ବୋମା ବିସ୍ଫୋରଣକାରୀଙ୍କ ମାଧ୍ୟମରେ ଏହି ଆକ୍ରମଣର ଯୋଜନା କରାଯାଇଛି । ତେଣୁ ସେନାକୁ ସଜାଗ କରି ଦିଆଯାଇଛି।
ଚଳିତ ସପ୍ତାହରେ ଏକ ଏନକାଉଣ୍ଟରରେ ଆତଙ୍କୀ ଗୋଷ୍ଠୀ ହିଜବୁଲ ମୁଜାହିଦ୍ଦିନର କାଶ୍ମରୀ ମୁଖ୍ୟ ରିୟାଜ ନୟକର ମୃତ୍ୟୁ ହେବା ପରେ ଏହାର ନୂଆ ମୁଖ୍ୟ ଗାଜି ହାଇଦର ଓରଫ ସୈଫୁଲ୍ଲା ଏଭଳି ଧମକ ଦେଇଛି । କାଶ୍ମୀରର ଜଣେ ସୁରକ୍ଷା ଅଧିକାରୀ କହିଛନ୍ତି ଯେ,ନୂଆ ହିଜବୁଲ ନେତାଙ୍କୁ ଚିହ୍ନଟ କରିବାକୁ ଶୀଘ୍ର ଅପରେସନ ଆରମ୍ଭ ହେବ । ହାଇଦରକୁ ଜଣେ ଉପମୁଖ୍ୟ ଜାଫର ଉଲ ଇସଲାମ ଓ ଜଣେ ସାମରିକ ଉପଦେଷ୍ଟା ଆବୁ ତାରିକ ଭାଇ ସହଯୋଗ କରୁଛନ୍ତି ।
ବର୍ତ୍ତମାନ ପାଇଁ, ସୁରକ୍ଷା ବାହିନୀ ତୁରନ୍ତ ଓ ଅଗ୍ରାଧିକାର ଭିତ୍ତିରେ ଆତଙ୍କବାଦୀ ସଂଗଠନ ଜୖସେ-ଇ-ମହମ୍ମଦର ଯୋଜନାକୁ ପଣ୍ଡ କରିବାକୁ ଅଭିଯାନ ଆରମ୍ଭ କରିଛି । ଆତଙ୍କବାଦୀ ଗୋଷ୍ଠୀ ପକ୍ଷରୁ ସୋମବାର ଏହି ସମ୍ଭାବ୍ୟ ଆକ୍ରମଣ ଯୋଜନା କରାଯାଇଛି କାରଣ ଗୁଇନ୍ଦା ସୂତ୍ର ଅନୁସାରେ ଗତ ସପ୍ତାହରେ ଜୖସେ-ଇ-ମହମ୍ମଦର ମୁଖ୍ୟ ଅବଦୁଲ ରଉଫ ଅଜଗର, ପାକିସ୍ତାନୀ ସେନା ତଥା ଆଇଏସଆଇ ମୁଖ୍ୟଙ୍କୁ ସାକ୍ଷାତ କରିଛି।
ସୁରକ୍ଷା ପଦାଧିକାରୀମାନେ କହିଛନ୍ତି ୧୧ ମେ’ ହେଉଛି ରମଜାନର ୧୭ ଦିନ । ସାଉଦି ଆରବରେ ରମଜାନର ୧୭ ଦିନରେ ବଦର ଯୁଦ୍ଧ ଅନୁଷ୍ଠିତ ହୋଇଥିଲା,ଏବଂ ମାତ୍ର ଶହେ ହେବ ସୈନିକ ଏହି ଯୁଦ୍ଧ ଜିତିଥିଲେ । ତେଣୁ ଇସଲାମିକ୍ ଇତିହାସରେ ଏହାକୁ ବିଜୟ ଦିବସ ଭାବେ ପାଳନ କରାଯାଏ।ପୁଣି ୧୧ ମେ’ ହେଉଛି ୧୯୯୮ରେ ଭାରତର ଦ୍ୱିତୀୟ ପୋଖରାନ୍ ଆଣବିକ ପରୀକ୍ଷଣର ୨୨ ତମ ବାର୍ଷିକୀ । ତେଣୁ ଏହି ଦିନ ଆତଙ୍କବାଦୀ ଆକ୍ରମଣ କରିବାକୁ ଆତଙ୍କୀ ସଂଗଠନ ଯୋଜନା କରିଛି ।
