ଡେସ୍କ: ଯଦି ଆପଣଙ୍କ ପାଖକୁ କୌଣସି ଅଜଣା ନମ୍ବରରୁ ଭିଡ଼ିଓ କିମ୍ବା +୮୪, +୬୨, +୬୦ ନମ୍ବରରୁ କଲ ଆସୁଛି ତେବେ ସାବଧାନ ହୋଇଯାଆନ୍ତୁ । ଏହାକୁ ରିସିଭ୍ କରିବାର କୌଣସି ଆବଶ୍ୟକତା ନାହିଁ । ଏହିପରି କଲ୍ ଆପଣଙ୍କୁ ଠକାମିରେ ପକାଇପାରେ । ଏବଂ ଆପଣଙ୍କ ଆକାଉଣ୍ଟରେ ଥିବା ଟଙ୍କା କିଛି ସମୟରେ ଲୁଟ ହୋଇପାରେ । ଏହାକୁ ନେଇ ସରକାର ମଧ୍ୟ ସତର୍କ ସୂଚନା ଜାରି କରିଛନ୍ତି ।
ଗତ କିଛି ମାସ ମଧ୍ୟରେ ୱାଟସ ଆପ୍ରେ +୮୪, +୬୨, +୬୦ ନମ୍ବରରୁ ଅଧିକ କଲ ଆସିବା ଆରମ୍ଭ ହୋଇଛି । ମାଲେସିଆ, କେନିଆ, ଭିଏତନାମ ଏବଂ ଇଥିଓପିଆରୁ ଏଭଳି ନମ୍ବରରୁ କଲ ଆସୁଥିବା ଜଣାପଡିଛି । ଏହି ଆଇଏସଡି ନମ୍ବରରୁ କଲ ଗୁଡିକ ସାଧାରଣତ ଭିଡ଼ିଓ କଲ ଅଟେ । ଏଗୁଡିକ ବ୍ୟତୀତ ଭାରତୀୟ କୋଡ୍ ସହିତ କିଛି ନମ୍ବରରୁ କଲ ଆସୁଥିବା ଅଜଣା ନମ୍ବର ମଧ୍ୟ ବିପଜ୍ଜନକ ହୋଇଛି । ଏହିସବୁ ନମ୍ବରରୁ ଭିଡ଼ିଓ କଲ କରାଯାଉଛି । ଯଦି ଆପଣ ଏହି କଲ ରିସିଭ୍ କରିବେ ଏବଂ କିଛି ସମୟ କଥା ହେବେ ସେହି ସମୟ ମଧ୍ୟରେ ସାଇବର ଠକ ସେମାନଙ୍କ କାମ କରିସାରିଥିବେ । ସାଇବର ଠକଙ୍କୁ କେବଳ କିଛି ସେକେଣ୍ଡର ଏକ ଭିଡ଼ିଓ ଦରକାର ହୋଇଥାଏ, ଯେଉଁଥିରେ ଆପଣଙ୍କ ଚେହେରା ଦୃଶ୍ୟମାନ ହେଉଥିବ । ଏହାପରେ ଆପଣଙ୍କ ଚେହେରାକୁ ଅଶ୍ଳୀଳ ଭିଡ଼ିଓ ସହିତ ଏଡିଟ୍ ହୁଏ ଏବଂ ଆରମ୍ଭ ହୁଏ ବ୍ଲାକମେଲିଂ ।
ଭିଡ଼ିଓକୁ ସୋସିଆଲ ମିଡ଼ିଆରେ ଭାଇରାଲ କରିବାକୁ ବାରମ୍ବାର ଧମକ ଦେଇ ଟଙ୍କା ଲୁଟିଥାନ୍ତି ଏହି ସାଇବର ଠକ । ୱାଟସ୍ ଆପ୍ ପକ୍ଷରୁ ଏଭଳି କଲ ରିସିଭ୍ କରିବାକୁ ମନା କରାଯାଇଛି । କଲ କାଟିବା ସହିତ ତୁରନ୍ତ ଏହି ନମ୍ବରକୁ ବ୍ଲାକ ଲିଷ୍ଟରେ ପକାଇବାକୁ କୁହାଯାଇଛି ।
