ମୁମ୍ବଇ: ହିନ୍ଦୀ ଧାରାବାହିକ ଜଗତର କ୍ୱିନ୍ ସାକ୍ଷୀ ତନୱାର୍ ନିଜ ଅଭିନୟ ମାଧ୍ୟମରେ କୋଟି କୋଟି ଲୋକଙ୍କ ହୃଦୟରେ ଏକ ବିଶେଷ ସ୍ଥାନ ଗ୍ରହଣ କରିଛନ୍ତି । ତେବେ ଦର୍ଶକଙ୍କୁ ଭରପୁର ମନୋରଞ୍ଜନ ଯୋଗାଉଥିବା ଅବିବାହିତ ସାକ୍ଷୀ ୪୫ ବର୍ଷ ବୟସରେ ଏବେ ଏକ ଛୋଟ ଶିଶୁ କନ୍ୟାକୁ ପୋଷ୍ୟ ସନ୍ତାନ ଭାବେ ଗ୍ରହଣ କରିଛନ୍ତି। ଏହି କଥା ସେ ଗଣମାଧ୍ୟମରେ ପ୍ରକାଶ କରିବା ପରେ ଦର୍ଶକ ଓ ତାଙ୍କ ପ୍ରଶଂସକମାନେ ତାଙ୍କର ଖୁବ୍ ପ୍ରଶଂସା କରିଛନ୍ତି।
ଏହା ଛଡ଼ା ସାକ୍ଷୀ ନିଜ ଇନଷ୍ଟାଗ୍ରାମ୍ ପେଜ୍ ରେ ଏକ ଫଟୋ ଶେୟାର କରି ଲେଖିଛନ୍ତି,- ‘‘ବାପା ମାଆଙ୍କ ଆଶୀର୍ବାଦ ଓ ପରିବାର ଲୋକଙ୍କ ସହଯୋଗରେ ମୁଁ ଏକ ଶିଶୁ କନ୍ୟାକୁ ପୋଷ୍ୟ ସନ୍ତାନ ଭାବେ ଗ୍ରହଣ କରିଛି। ସେ ଖୁବଶୀଘ୍ର ୯ ମାସର ହୋଇଯିବ । ତା’ ଆଗମନରେ ମୋ ଜୀବନରେ ଖୁସି ଭରି ଯାଇଛି ଓ ଏହା ମୋ ଜୀବନର ଏକ ସୁନ୍ଦର ମୁହୂର୍ତ୍ତ। ମୋର ସେହି କୁନି ଝିଅର ନାମ ‘ଦିତ୍ୟା’। ଯାହାର ଅର୍ଥ ମା’ ଲକ୍ଷ୍ମୀ ଓ ପ୍ରାର୍ଥନାର ଉତ୍ତର ଦେବା। ”
ସାକ୍ଷୀଙ୍କର ଏହି ପଦକ୍ଷେପ ମାନବିକତାର ମୂଲ୍ୟବୋଧକୁ ସୂଚାଉଛି ବୋଲି ତାଙ୍କର ଅନେକ ପ୍ରଶଂସକ ମତବ୍ୟକ୍ତ କରିଛନ୍ତି।