ରାଉରକେଲା : ରାଉରକେଲା ବନଖଣ୍ଡର ପାନପୋଷ ବନାଞ୍ଚଳ ଅନ୍ତର୍ଗତ ନୂଆଗାଁରେ ୧୦ ତାରିଖରେ ବିଦ୍ୟୁତ୍ ଆଘାତରେ ହାତୀ ମୃତ୍ୟୁ ଘଟଣାରେ ବନ ବିଭାଗ କାର୍ଯ୍ୟାନୁଷ୍ଠାନ ଗ୍ରହଣ କରିଛି। ହାତୀ ମୃତ୍ୟୁ ପାଇଁ ସେଠାକାର ଜଣେ ଇଟାଭାଟି ମାଲିକ ଇମ୍ତିଆଜ ଆଲମଙ୍କୁ ବିଭାଗ ଦାୟୀ କରିଛି। ଇମତିଆଜ ଫେରାର ଥିବାବେଳେ ତାର ସୁପରଭାଇଜର ଭାବେ କାମ କରୁଥିବା ଚନ୍ଦ୍ରମଣୀ ରଣାଙ୍କୁ ଗିରଫ କରାଯାଇଛି।
ଇଟାଭାଟିକୁ ୧୯ ବର୍ଷ ହେଲା ସଂଯୋଗ ହୋଇଥିବା ଚୋରା ବିଦ୍ୟୁତ୍ ତା’ର ଲାଗି ଏଭଳି ଦୁର୍ଘଟଣା ଘଟଛି ବୋଲି ରାଉରକେଲା ବନଖଣ୍ଡ ଅଧିକାରୀ ଯଶୋବନ୍ତ ସେଠୀ କହିଛନ୍ତିି। ଶ୍ରୀ ସେଠୀ କହିଲେ ଯେ, ପାନପୋଷ ବନାଞ୍ଚଳ ଅନ୍ତର୍ଗତ ବଲାଣୀ ପଞ୍ଚାୟତର ନୂଆଗାଁ ଅଞ୍ଚଳରେ ଏକ ହାତୀ ପଲ ଚଳପ୍ରଚଳ କରୁଥିଲେ। ଏହି ସମୟରେ ଏକ ମାଈ ହାତୀକୁ ବିଦ୍ୟୁତ୍ ଆଘାତ ଲାଗିବାରୁ ସେଠାରେ ତା’ର ମୃତ୍ୟୁ ହୋଇଯାଇଥିଲା।
ବିଭାଗର ଅଧିକାରୀ ପହଞ୍ଚି ତଦନ୍ତ କରିିଥିଲେ। ତଦନ୍ତ ବେଳେ ଦୁର୍ଘଟଣାସ୍ଥଳରୁ ଅଳ୍ପ ଦୂରରେ ଇଟାଭାଟି ରହିଛି। ଭାଟି ମାଲିକ ଇମ୍ତିଆଜ ହୁକ ପକାଇ ବିଦ୍ୟୁତ୍ ବ୍ୟବହାର କରୁଥିବା ଜଣାପଡ଼ିଥିଲା। ବିଦ୍ୟୁତ୍ ତା’ର ଓହଳି ପଡ଼ିଥିବା ବେଳେ ମଝିରେ ମଝିରେ କଟିଯାଇଛି। ହାତୀ ପଲ ରାସ୍ତାରେ ଯାତାୟତ ବେଳେ ବିଦ୍ୟୁତ ତା’ର ସଂସ୍ପର୍ଶରେ ଆସିବାରୁ ଏଭଳି ଘଟଣା ଘଟିଥିବା ଶ୍ରୀ ସେଠୀ କହିଥିଲେ।
