ପାଟଣା : ୨୦ ନଂ ଜାତୀୟ ରାଜପଥ ଅନ୍ତର୍ଗତ ଢେଙ୍କିକୋଟର ଓଭରବ୍ରିଜ ଛକ ତଳ ରାସ୍ତା ମରଣଯନ୍ତା ପାଲଟିଛି। ସର୍ଭିସ୍ ରୋଡର ଦୁଇ ପାର୍ଶ୍ଵରେ ଖାଲଖମା ସୃଷ୍ଟି ହୋଇଛି। ବର୍ଷା ସମୟରେ ଖାଲରେ ପଡ଼ି ବାଇକ ସାଇକେଲ ଦୁର୍ଘଟଣାର ସମ୍ମୁଖୀନ ହେଉଛନ୍ତି। ବିଶେଷ କରି ଢେଙ୍କିକୋଟର ସର୍ଭିସ ରୋଡ଼ରୁ ପାଟଣା – କରଞ୍ଜିଆ ରାସ୍ତା ସଂଯୋଗ ସ୍ଥଳରେ ଦୁଇ ପାର୍ଶ୍ଵରେ ଖାଲଖମା ଯାତ୍ରୀ ତଥା ଚାଳକ ମାନଙ୍କୁ ଅସୁବିଧାରେ ପକାଉଛି। ରାସ୍ତାରୁ ପିଚୁ ଏତେ ପରିମାଣରେ ଉଠି ଗଲାଣି ଯେ ଟେଲିଫୋନ କେବୁଲ ମଧ୍ୟ ଉପରକୁ ବାହାରି ପଡ଼ିବା ସହ ଯାନବାହାନ ଚକା ମାଡ଼ରେ ତାହା ମଧ୍ୟ ନଷ୍ଟ ହେଉଛି।
ଓଭରବ୍ରିଜ ନିର୍ମାଣ ସମୟରେ ସର୍ଭିସ୍ ରୋଡ ଡ୍ରେନ କାମ ସଂପୂର୍ଣ୍ଣ କରାଯାଇନଥିବା ବେଳେ ଆଜି ପର୍ଯ୍ୟନ୍ତ ମଧ୍ୟ ଡ୍ରେନ କାମ ପୂର୍ଣ୍ଣାଙ୍ଗ ହୋଇନଥିବାରୁ ଓଭରବ୍ରିଜ ତଳ ପାର୍ଶ୍ୱରେ ଆବର୍ଜନା ପଚି ସଢ଼ି ଦୁର୍ଗନ୍ଧମୟ ପରିବେଶ ସୃଷ୍ଟି ହୋଇଛି। ପୁରୁଷୋତ୍ତମ ମେଡିସିନ ଷ୍ଟୋର ପାଖ ଗଳାବାଟ ସମେତ ଅନ୍ୟ ୨ଟି ଗଳାବାଟରେ ବର୍ଷା ପାଣି ଛାତରୁ ପଡ଼ିବା ସହ ଚିପ୍ସ ବାଲି ଗଳୁଥିବାରୁ ଏହା ଭୁଶୁଡ଼ିବା ଆଶଙ୍କା ମଧ୍ୟ ରହିଛି। କର୍ତ୍ତୃପକ୍ଷ ସମସ୍ୟା ପ୍ରତି ନଜର ଦେବାକୁ ଅଞ୍ଚଳବାସୀ ଦାବି ଜଣାଇଛନ୍ତି।
