ରେଙ୍ଗାଲିକ୍ୟାମ୍ପ: ଅତାବିରା ବ୍ଲକ ଜହ୍ନାପଡା ପଞ୍ଚାୟତ ଦେବାହାଲ ଗ୍ରାମର ଉପର ପଡାରେ କଲ୍ୟାଣ ମଣ୍ଡପ ନିର୍ମାଣ କରିବା ପାଇଁ ଜଗା ଚିହ୍ନଟ କରାଇଦେବା ପାଇଁ ଗ୍ରାମର ଉପରପଡାର ସ୍ଥାୟୀ ବାସିନ୍ଦା ଏକତ୍ରିତ ହୋଇ ଅତାବିରା ତହସିଲ କାର୍ଯ୍ୟାଳୟକୁ ଆସି ତହସିଲଦାର ବ୍ରଜ କିଶୋର ସାହୁ ଓ ଅତିରିକ୍ତ ତହସିଲଦାର ଅଙ୍କିତ ପଣ୍ଡାଙ୍କ ଉପସ୍ଥିତିରେ ଏକ ଲିଖିତ ଦାବିପତ୍ର ପ୍ରଦାନ କରିଛନ୍ତି। ସୂଚନାଯୋଗ୍ୟ ଯେ, ଉପର ପଡ଼ାରେ କଲ୍ୟାଣ ମଣ୍ଡପ ନିର୍ମାଣ ପାଇଁ ୧୦ ଲକ୍ଷ ଟଙ୍କାର ଅନୁଦାନ ଆସିଛି। ହେଲେ କଲ୍ୟାଣ ମଣ୍ଡପ ପାଇଁ ଜାଗା ଚିହ୍ନଟ ହୋଇପାରି ନାହିଁ । ଯାହାଦ୍ବାରା ୬ ତାରିଖରେ ଗ୍ରାମର ଭାଗବତ ମନ୍ଦିର ପ୍ରାଙ୍ଗଣରେ ଏକ ସଭାର ଆୟୋଜନ କରାଯାଇଥିଲା ଓ କଲ୍ୟାଣ ମଣ୍ଡପ ପାଇଁ ଯେଉଁ ସରକାରୀ ଜାଗା ପ୍ରଶାସନ ପକ୍ଷରୁ ଚିହ୍ନଟ ହେବ ତାକୁ ସମସ୍ତେ ସମର୍ଥନ କରିବାକୁ ପ୍ରସ୍ତାବ ରଖାଗଲା। ସତ୍ୟବାନ ବେହେରା, ସୁଦାମ କଠାର, ଶଶୀ ସେଟ, ବୃନ୍ଦାବନ ବେହେରା, ମନବୋଧ କୁଦେଇ, ଯତୀନ ବେହେରା ପ୍ରମୁଖଙ୍କ ସମେତ ପଡ଼ାବାସୀ ସାମିଲ ହୋଇଥିଲେ।
Comments are closed.