ସମାଜ ଡିଜିଟାଲ ଡେସ୍କ: ଲୋକପ୍ରିୟ କୋରିଓଗ୍ରାଫର ରେମୋ ଡିସୁଜା ଓ ତାଙ୍କ ପତ୍ନୀ ଲିଜେଲ ଡିସୁଜାଙ୍କ ବିରୋଧରେ ଠକେଇ ମାମଲା ରୁଜୁ ହୋଇଛି। ରେମୋ ଓ ଲିଜେଲ ୧୨ କୋଟି ଟଙ୍କାର ଠକେଇ କରିଥିବା ନେଇ ମହାରାଷ୍ଟ୍ରର ଏକ ଡାନ୍ସ ଗ୍ରୁପ୍ର ଅଭିଯୋଗ ଆଧାରରେ ଥାନାରେ ମାମଲା ରୁଜୁ ହୋଇଛି। ମିଳିଥିବା ସୂଚନା ମୁତାବକ, ଠାଣେ ଜିଲାରେ ଅନ୍ୟ ୫ ଜଣ ବ୍ୟକ୍ତିଙ୍କ ବିରୋଧରେ ମଧ୍ୟ ମାମଲା ରୁଜୁ କରାଯାଇଛି। ନିକଟରେ ଏ ସଂକ୍ରାନ୍ତରେ କ୍ରାଇମବ୍ରାଞ୍ଚ ରେମୋ ଓ ଲିଜେଲ ଡିସୁଜାଙ୍କୁ ୬ ଘଣ୍ଟା ପଚରାଉଚରା କରିଛି।
ଅଭିଯୋଗକାରୀ ପ୍ରଥମେ ନବଗର ଏବଂ ମୀରା ରୋଡ ଥାନାରେ ଅଭିଯୋଗ କରିଥିଲେ, କିନ୍ତୁ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରା ନ ଯିବାରୁ ସେମାନେ ହାଇକୋର୍ଟଙ୍କ ଦ୍ଵାରସ୍ଥ ହୋଇଥିଲେ। ଏବେ କୋର୍ଟଙ୍କ ନିର୍ଦ୍ଦେଶ ପରେ ମୀରା ଭୟାନ୍ଦର-ବସଇ ବିରାର କମିଶନରେଟ ପୁଲିସର କ୍ରାଇମବ୍ରାଞ୍ଚ ଟିମ୍ ଏହି ମାମଲାର ତଦନ୍ତ କରୁଛି। ନିକଟରେ ରେମୋ ଡିସୁଜା ଓ ତାଙ୍କ ପତ୍ନୀଙ୍କୁ ସମନ ଜାରି କରିଥିଲେ। ଏହାପରେ ଉଭୟଙ୍କୁ ଦୀର୍ଘ ୬ ଘଣ୍ଟା ପଚରାଉଚରା କରାଯାଇଥିବା ଜଣାପଡ଼ିଛି।
ଏହି ମାମଲା ‘ଭି ଅନବିଟେବଲ’ ଡାନ୍ସ ଗ୍ରୁପ୍ ସହ ଜଡ଼ିତ। ଏହି ଗ୍ରୁପ୍ ଏକ ନୃତ୍ୟ ପ୍ରତିଯୋଗିତା ଜିତିଥିଲା, ଏହାପରେ ଆମେରିକା ଗଟ୍ ଟ୍ୟାଲେଣ୍ଟରେ ଦ୍ୱିତୀୟ ସ୍ଥାନ ଅଧିକାର କରିଥିଲା। କୋରିଓଗ୍ରାଫର ରେମୋ ତାଙ୍କ ଜୀବନ କାହାଣୀ ଉପରେ ଏକ ଚଳଚ୍ଚିତ୍ର ନିର୍ମାଣ କରିବାକୁ ଘୋଷଣା କରିଥିଲେ। ଏହି ଗ୍ରୁପ୍ ଅଭିଯୋଗ କରିଛି ଯେ, ବିଭିନ୍ନ ପ୍ରତିଯୋଗିତା ଏବଂ କାର୍ଯ୍ୟକ୍ରମରୁ ପ୍ରାପ୍ତ ଟଙ୍କା, ପୁରସ୍କାର ରାଶି, ଚଳଚ୍ଚିତ୍ର ଆଦି ପାଇଁ ପ୍ରାପ୍ତ ଅର୍ଥ ହଡ଼ପ କରାଯାଇଛି।
