ସୋର : ଜଣେ ନାବାଳିକାକୁ ଦୁଷ୍କର୍ମ କରାଯାଇଥିବା ଅଭିଯୋଗ ହୋଇଛି। ଏନେଇ ସୋର ଥାନାରେ ଅଭିଯୋଗ ହେଲା ପରେ ପୁଲିସ ଘଟଣାର ତଦନ୍ତ କରି ଅଭିଯୁକ୍ତକୁ ଗିରଫ କରିଛି। ଅଭିଯୁକ୍ତ ହେଉଛି ମୁନା ବାରିକ। ପୀଡିତାଙ୍କ ଅବସ୍ଥା ଗୁରୁତର ଥିବାରୁ ସେ ଡାକ୍ତରଖାନାରେ ଚିକିତ୍ସାଧୀନ ଅଛନ୍ତି।
ସୂଚନାଯୋଗ୍ୟ ଯେ, ସୋମବାର ସୋର ଥାନା ତେଣ୍ଟଇ ଗ୍ରାମର ଜଣେ ନାବାଳିକା ତାଙ୍କ ସାନ ଭଉଣୀ ସହ ଜାଗର ଦେଖିବାକୁ ଯାଇଥିଲେ। ଅଭିଯୁକ୍ତ ମୁନା ନାବାଳିକାଙ୍କୁ ଚକୋଲେଟ ଦେଇ ବିଲକୁ ନେଇ ସେଠାରେ ବଳାତ୍କାର କରିଥିବା ଅଭିଯୋଗ ହୋଇଛି। ନାବାଳିକାଙ୍କ ସାନ ଭଉଣୀ ତାଙ୍କୁ ନ ପାଇବାରୁ ବୁଢୀମା’ଙ୍କୁ ଜଣାଇଥିଲେ। ଏହାପରେ ପରିବାର ଲୋକେ ବହୁ ଖୋଜାଖୋଜି କରିବା ପରେ ନାବାଳିକାଙ୍କୁ ଗୁରୁତର ଅବସ୍ଥାରେ ବିଲରୁ ଉଦ୍ଧାର କରିଥିଲେ। ଏ ସମ୍ପର୍କରେ ନାବାଳିକାଙ୍କ ବାପା ବୁଧବାର ଦିନ ଅନନ୍ତପୁର ବିଟ ହାଉସରେ ଅଭିଯୋଗ କରିଥିଲେ। ପରେ ସୋର ପୁଲିସ ଅଭିଯୁକ୍ତ ଗିରଫ କରିଛି।
