ମାଲକାନାଗିରି : ଛତିଶଗଡ଼ ରାଜନାନ୍ଦଗାଁଓରେ ଶନିବାର ସକାଳେ ଡିଷ୍ଟ୍ରିକ୍ଟ ରିଜର୍ଭ ଗ୍ରୁପ (ଡିଆରଜି) ଯବାନଙ୍କ ସହ ସଂଘର୍ଷରେ ୭ ଜଣ ନକ୍କଲ ନିହତ ହୋଇଛନ୍ତି। ଯବାନଙ୍କ ସହ ଗୁଳି ବିନିମୟରେ କେତେକ ନକ୍ସଲ ଆହତ ହୋଇଛନ୍ତି। ଯବାନମାନେ ସ୍ଥାନୀୟ ଅଞ୍ଚଳକୁ ଘେରାବନ୍ଦୀ କରି ତଲାସୀ ଅଭିଯାନ ଚଳାଇଛନ୍ତି।
ଛତିଶଗଡ଼ ପୁଲିସ୍ ମହାନିର୍ଦେଶକ ଡିଏମ ଅବସ୍ଥିଙ୍କ ସୂଚନା ଅନୁଯାୟୀ ଡିଆରଜି ଯବାନମାନେ ସକାଳ ୮ଟାରେ ତଲାସୀ ଅଭିଯାନରେ ବାହାରିଥିଲେ। ଏହି ସମୟରେ ଛତିଶଗଡ଼-ମହାରାଷ୍ଟ୍ର ସୀମାନ୍ତ ବଙ୍ଗାଡି ପୁଲିସ୍ ଥାନା ଅଧୀନ ରାଜନାନ୍ଦଗାଁଓ ସୀତାଗୋଟା ଜଙ୍ଗଲରେ କେତେକ ନକ୍ସଲ ଲୁଚି ରହିଥିବା ସୂଚନା ମିଳିଥିଲା। ସୂଚନା ଆଧାରରେ ଡିଆରଜି ଏବଂ ଛତିଶଗଡ଼ ସଶସ୍ତ୍ର ବଳ (ସିଏଏଫ) ଏବଂ ଜିଲା ପୁଲିସ୍ ବଳ ସେଠାରେ ପହଞ୍ଚି ତଲାସୀ ଅଭିଯାନ ଆରମ୍ଭ କରିଥିଲେ। ଜଙ୍ଗଲରେ ଯବାନଙ୍କ ସହ ନକ୍ସଲଙ୍କ ସଂଘର୍ଷ ଘଟିଥିଲା। ସଂଘର୍ଷ ପରେ ସେଠାରୁ ୭ ନକ୍ସଲଙ୍କ ଶବ ସହ ଏକେ-୪୭ ରାଇଫଲ, ୩୦୩ ରାଇଫଲ, ୧୨ ବୋର ଗନ, ସିଙ୍ଗିଲ ସଟ ରାଇଫଲ ଏବଂ ବିପୁଳ ପରିମାଣର ଗୋଳା ବାରୁଦ ମିଳିଛି।
