ରାଜୀବ କୁମାରଙ୍କ ବଦଳି ; ଅନୁଜ ଶର୍ମା ନୂଆ କମିଶନର

କଲକାତା : ସାରଦା ଚିଟ୍‌ଫଣ୍ଡ ମାମଲାରେ ବିବାଦୀୟ ହୋଇପଡିଥିବା କଲକାତା ପୁଲିସ କମିଶନର ରାଜୀବ କୁମାରଙ୍କୁ ସିବିଆଇ ଅଧିକାରୀ ମେଘାଳୟରେ ଜେରା କରିବା ପରେ ମଙ୍ଗଳବାର ତାଙ୍କୁ ରାଜ୍ୟ ସରକାର ବଦଳି କରିଛନ୍ତି। ରାଜୀବଙ୍କ ସ୍ଥାନରେ ଅନୁଜ ଶର୍ମାଙ୍କୁ ନୂତନ ପୁଲିସ କମିଶନର ଭାବେ ଅବସ୍ଥାପିତ କରାଯାଇଛି। ରାଜୀବଙ୍କୁ ଏଡିଜି ଓ ଅପରାଧ ଅନୁସନ୍ଧାନ ବିଭାଗ (ସିଆଇଡି)ର ଆଇଜିପି ରୂପେ ବଦଳି କରାଯାଇଛି। ୧୯୮୯ ବ୍ୟାଚ୍‌ ଆଇପିଏସ ଅଫିସର ରାଜୀବ କୁମାର ସାରଦା ଚିଟ୍‌ଫଣ୍ଡ ମାମଲାରେ ତଥ୍ୟପ୍ରମାଣକୁ ନଷ୍ଟ କରିବା ତଥା ଏପଟସେପଟ
କରିଥିବା ସିବିଆଇ ଅଭିଯୋଗ କରିଛି। ଏହି ଘଟଣାରେ ବାରମ୍ବାର ସିବିଆଇ ପକ୍ଷରୁ ରାଜୀବ କୁମାରଙ୍କୁ ସମନ ଜାରି ସତ୍ତ୍ବେ ସେ ତଦନ୍ତ ସଂସ୍ଥା ନିକଟରେ ହାଜର ନହେବାରୁ ଜେରା ଲାଗି ସିବିଆଇ ଖୋଦ୍ ରାଜୀବଙ୍କ କଲକାତାସ୍ଥିତ ସରକାରୀ କ୍ବାଟର୍ସରେ ପହଞ୍ଚିବା ପରେ ଏହାକୁ ବିରୋଧ କରି ପାଲଟା ସିବିଆଇ ଅଧିକାରୀଙ୍କୁ ଅଟକ ରଖିଥିଲା କଲକାତା ପୁଲିସ। ରାଜୀବ କୁମାରଙ୍କୁ ମୁଖ୍ୟମନ୍ତ୍ରୀ ମମତା ବାନାର୍ଜୀ ସିଧାସଳଖ ସମର୍ଥନ କରିବା ସହ କେନ୍ଦ୍ର ସରକାରଙ୍କ ବିରୋଧରେ ଗଣତନ୍ତ୍ର ବଞ୍ଚାଇବା ସ୍ଲୋଗାନ ଦେଇ ଧାରଣା ମଧ୍ୟ ଦେଇଥିଲେ। ଫଳରେ ସିବିଆଇ ସୁପ୍ରିମକୋର୍ଟରେ ଆବେଦନ କରିବା ପରେ ରାଜୀବ କୁମାରଙ୍କୁ ମେଘାଳୟରେ ସିବିଆଇ ତିନିଦିନ ଧରି ଜେରା କରି ଅନେକ ଗୁରୁତ୍ବପୂର୍ଣ୍ଣ ତଥ୍ୟପ୍ରମାଣ ହାସଲ କରିଥିବା କୁହାଯାଉଛି। ଆଗକୁ ସାରଦା ଚିଟ୍‌ଫଣ୍ଡ ମାମଲାରେ ରାଜୀବଙ୍କ ସମସ୍ୟା ଅଧିକ ବଢିବାକୁ ଥିବାରୁ ତାଙ୍କୁ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ପୁଲିସ କମିଶନ ପଦରୁ ବଦଳି କରାଇଥିବା ଜଣାପଡିଛି।