ଡେସ୍କ: କଂଗ୍ରେସ ନେତା ରାହୁଲ ଗାନ୍ଧୀଙ୍କ ଲୋକସଭା ସଦସ୍ୟତା ପଦ ରଦ୍ଦ ହୋଇଛି। ଲୋକସଭା ସଚିବାଳୟ ପକ୍ଷରୁ ଏ ନେଇ ବିଜ୍ଞପ୍ତି ପ୍ରକାଶ ପାଇଛି। ଗତକାଲି ‘ମୋଦୀ ସରନେମ’ ମାମଲାରେ ସୁରଟର ଏକ କୋର୍ଟ ଶ୍ରୀ ଗାନ୍ଧୀଙ୍କୁ ୨ ବର୍ଷ ଜେଲ ଦଣ୍ଡାଦେଶ ଦେବାପରେ ଆଜି ଲୋକସଭା ସଚିବାଳୟ ତାଙ୍କ ସଦସ୍ୟତା ରଦ୍ଦ କରିଛନ୍ତି। କେରଳର ୱାଏନାଡ଼ ସଂସଦୀୟ କ୍ଷେତ୍ରରୁ ଶ୍ରୀ ଗାନ୍ଧୀ ନିର୍ବାଚିତ ହୋଇଥିଲେ।
୨୦୧୯ ନିର୍ବାଚନ ସମୟରେ କର୍ଣ୍ଣାଟକ କୋଲାରରେ ଏକ ନିର୍ବାଚନୀ ରାଲିରେ ଶ୍ରୀ ଗାନ୍ଧୀ ଯେଉଁ ମନ୍ତବ୍ୟ ଦେଇ ଥିଲେ ତାହା ‘ମୋଦୀ’ ସାଙ୍ଗିଆର ବିରୁଦ୍ଧାଚରଣ କରୁଛି ଓ ଅପମାନଜନକ ବୋଲି କୁହାଯାଇଥିଲା। ବିଜେପି ବିଧାୟକ ପୁର୍ନେସ ମୋଦୀ ଏ ନେଇ କୋର୍ଟଙ୍କ ଦ୍ୱାରସ୍ତ ହୋଇଥିଲେ। ସେହି ରାଲିରେ ରାହୁଲ କହିଥିଲେ ଯେ ‘how come all the thieves have Modi as the common surname’ ଅର୍ଥାତ ‘ସମସ୍ତ ଚୋର ମାନଙ୍କ ସାଙ୍ଗିଆ ମୋଦୀ’।
ଏହି ଘଟଣାରେ କଂଗ୍ରେସ ଲୋକସଭା ବାଚସ୍ପତିଙ୍କ ନିଷ୍ପତ୍ତିକୁ ସମାଲୋଚନା କରିଛି। ଦଣ୍ଡାଦେଶ ପରେ କୋର୍ଟ ତାଙ୍କୁ ଉପର କୋର୍ଟରେ ଅପିଲ କରିବା ପାଇଁ ୩୦ ଦିନ ସମୟ ଦେଇଥିବା ବେଳେ ଏଭଳି ନିଷ୍ପତ୍ତି ତରବରିଆ ଭାବେ ନିଆଯାଇଥିବା ଆଇନଜୀବୀ ମାନେ ମତ ଦେଇଛନ୍ତି।
