ରାଫେଲ ଚୁକ୍ତି: ଗ୍ୟାରେଣ୍ଟି ଦେଇନାହାନ୍ତି ଫ୍ରାନ୍ସ ସରକାର

ନୂଆଦିଲ୍ଳୀ: ରାଫେଲ୍‍ ଚୁକ୍ତି ବିବାଦ ଏବେ ତୀବ୍ର ରୂପ ଧାରଣ କରିଥିବା ବେଳେ ଏବେ ଆଉ ଏକ ନୂଆ ସୂଚନା ମିଳିଛି। ରାଫେଲ୍‍ ସଂକ୍ରାନ୍ତୀୟ ଚୁକ୍ତି ବେଳେ ଏହାର କାର୍ଯ୍ୟକାରୀତା, ସଫଳତା ଓ ଚୁକ୍ତି ସମ୍ପର୍କିତ ଜଟିଳତାକୁ ନେଇ ଫ୍ରାନ୍ସ ସରକାର କୌଣସି ଗ୍ୟାରେଣ୍ଟି ଦେଇନାହାନ୍ତି। କେବଳ ଏକ ଆଶ୍ୱାସନା ପତ୍ର ଦେଇଛନ୍ତି। ସୁପ୍ରିମକୋର୍ଟରେ ରାଫେଲ୍‍ ଚୁକ୍ତି ବିବାଦ ଶୁଣାଣି ବେଳେ ଆଟର୍ଣ୍ଣି ଜେନେରାଲ୍‍ କେ କେ ବେଣୁଗୋପାଳ ଏହି ସୂଚନା ଦେଇଛନ୍ତି।
ଏହାପୂର୍ବରୁ ପ୍ରତିରକ୍ଷା ମନ୍ତ୍ରାଳୟ ପକ୍ଷରୁ କୁହାଯାଇଥିଲା ଯେ ରାଫେଲ୍‍ ବିମାନ କ୍ରୟ ପୂର୍ବରୁ ଆନ୍ତଃସରକାରୀ ଚୁକ୍ତିନାମା ସ୍ୱାକ୍ଷର ହୋଇଥିଲା। ଚୁକ୍ତି ବେଳେ ଫ୍ରାନ୍ସ ପକ୍ଷରୁ ପର୍ଯ୍ୟାପ୍ତ ପ୍ରତିଶ୍ରୁତି ଦିଆଯାଇଥିôଲା। ଡାସଲ୍ଟ ଦ୍ୱାରା ନିର୍ମିତ ରାଫେଲ୍‍ ଫାଇଟର ଜେଟ୍‍ର ଏକାଧିକ ଥର ପରୀକ୍ଷଣ କରାଯାଇଛି, ଯଦି କୌଣସି ତ୍ରୁଟି ଥାଏ ତେବେ ତା’ ସ୍ଥାନରେ ଆଉ ଏକ ବିମାନ ଯୋଗାଇ ଦିଆଯିବ ବୋଲି ଫ୍ରାନ୍ସ ସରକାର ପ୍ରତିଶ୍ରୁତି ଦେଇଥିଲେ ବୋଲି ପ୍ରତିରକ୍ଷା ଅଧିକାରୀମାନେ କହିଥିଲେ। କିନ୍ତୁ ଚୁକ୍ତି ପାଇଁ ଫ୍ରାନ୍ସ ସରକାରୀ ଭାବେ ଦାୟୀ ନୁହେଁ ବୋଲି ଚୁକ୍ତିନାମାରେ ଉଲ୍ଳେଖ ଥିବା ଏବେ ଜଣାପଡ଼ିଛି।
ବାସ୍ତବରେ କୌଣସି ଦେଶ ସହିତ ପ୍ରତିରକ୍ଷା ସମ୍ପର୍କିତ ଚୁକ୍ତି ବେଳେ ‘ସରକାରୀ ଉତ୍ତରଦାୟୀ’ ଶବ୍ଦ ବ୍ୟବହାର ହୁଏ ନାହିିଁ। କେବଳ ସାମଗ୍ରୀର ମାନ, ମୂଲ୍ୟ, ମରାମତି ଓ ଅନ୍ୟାନ୍ୟ ଆନୁଷଙ୍ଗିକ ବିଷୟରେ ସମ୍ପୃକ୍ତ ଦେଶ ପକ୍ଷରୁ କିଛିଟା ୱାରେଣ୍ଟି ମିଳିଥାଏ। ରୁଷ, ଆମେରିକା ଓ ଅନ୍ୟାନ୍ୟ ଦେଶ ସହିତ ପ୍ରତିରକ୍ଷା ସାମଗ୍ରୀ କ୍ରୟ ବେଳେ ମଧ୍ୟ ସରକାରୀ ଗ୍ୟାରେଣ୍ଟି ଦିଆଯାଇନାହିଁ। ତେଣୁ କେନ୍ଦ୍ର ସରକାର ଏ ସମ୍ପର୍କରେ ଦେଶବାସୀଙ୍କ ଅନ୍ଧାରରେ ରଖିଥିବା ବିରୋଧୀ ଦଳ ପକ୍ଷରୁ ଅଭିଯୋଗ ହୋଇଛି।