ଭୁବନେଶ୍ୱର : ଲୋକପ୍ରିୟ ଓଡ଼ିଆ କଣ୍ଠ ଶିଳ୍ପୀ ତପୁ ମିଶ୍ରଙ୍କର ପରଲୋକ ଘଟିଛି। ଭୁବନେଶ୍ୱରର ଏକ ଘରୋଇ ହସ୍ପିଟାଲରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ଘଟିଛି। କିଛିଦିନ ତଳେ କରୋନା ସଂକ୍ରମିତ ହୋଇ ଥିଲେ ସେ ସୁସ୍ଥ ହେବା ପରେ ତାଙ୍କର ଫୁସଫୁସ ସଂକ୍ରମଣ ହୋଇଥିଲା। ଜଣେ ଆଗଧାଡିର ଗାୟିକା ଭାବେ ସେ ଓଡ଼ିଆ ଫିଲ୍ମ ଜଗତରେ ସୁନାମ ଅର୍ଜନ କରିଥିଲେ। ଦୀର୍ଘ ୨୦ ବର୍ଷ ଧରି ସେ ଓଡ଼ିଆ ଫିଲ୍ମ ଜଗତରେ ଜଣେ ଲୋକପ୍ରିୟ ଗାୟିକା ଭାବେ ପରିଚିତ ଥିଲେ। ତପୁ ମିଶ୍ରଙ୍କ ବିୟୋଗରେ ଓଡ଼ିଆ ଫିଲ୍ମ ଓ ସଙ୍ଗୀତ ଜଗତରେ ଶୋକର ଛାୟା ଖେଳିଯାଇଛି।
ନିକଟରେ ରାଜ୍ୟ ସଂସ୍କୃତି ବିଭାଗ ପକ୍ଷରୁ ତପୁଙ୍କ ଚିକିତ୍ସା ପାଇଁ ଏକ ଲକ୍ଷ ଟଙ୍କାର ସହାୟତା ପ୍ରଦାନ କରା ଯାଇଥିଲା। କିନ୍ତୁ ସମସ୍ତ ପ୍ରକାର ପ୍ରୟାସ ସତ୍ୱେ ତପୁ ଜୀବନ ଯୁଦ୍ଧରେ ହାରିଗଲେ। ‘କୁଳନନ୍ଦନ’ ଫିଲ୍ମରୁ ସେ ନିଜର କ୍ୟାରିୟର ଆରମ୍ଭ କରିଥିଲେ। ପ୍ରାୟ ୧୫୦ଟି ଫିଲ୍ମରେ ତପୁ ଗୀତ ଗାଇଥିଲେ। ‘ଆଇ ଲଭ ୟୁ’ ଓ ‘ଚକୋଲେଟ’ ଭଳି ହିଟ୍ ଫିଲ୍ମରେ ଗୀତ ଗାଇ ସେ ଲୋକପ୍ରିୟତାର ଶୀର୍ଷରେ ପହଞ୍ଚିଥିଲେ।
