ନୂଆଦିଲ୍ଲୀ: ବିଶ୍ୱକର୍ମା ପୂଜା ଏବଂ ନିଜ ଜନ୍ମଦିନ ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଦେଶବାସୀଙ୍କୁ ବଡ଼ ଉପହାର ଦେଇଛନ୍ତି। ରବିବାର ବିଶ୍ବକର୍ମା ଯୋଜନାର ଶୁଭାରମ୍ଭ ହୋଇଛି। କୌଳିକ ବୃତ୍ତିକୁ ପ୍ରୋତ୍ସାହିତ ତଥା ସହଯୋଗ କରିବା ଉଦ୍ଦେଶ୍ୟରେ କେନ୍ଦ୍ର ସରକାର ଏହି ଯୋଜନାର ଶୁଭାରମ୍ଭ କରିଛନ୍ତି। ପ୍ରଧାନମନ୍ତ୍ରୀ ପ୍ରଥମେ ଦିଲ୍ଲୀର ଦ୍ୱାରକାଠାରେ ‘ଯଶୋଭୂମି’ ନାମକ ଇଣ୍ଡିଆ ଇଣ୍ଟରନେସନାଲ କନ୍ଭେନ୍ସନ୍ ଆଣ୍ଡ୍ ଏକ୍ସପୋ ସେଣ୍ଟରର ଉଦ୍ଘାଟନ କରିଥିଲେ। ଏହାପରେ ସେଠାରେ ବିଶ୍ବକର୍ମା ଯୋଜନାର ଶୁଭାରମ୍ଭ କରିଛନ୍ତି। ଯଶୋଭୂମି କନ୍ଭେନ୍ସନ୍ ସେଣ୍ଟରରେ ୧୮ ଜଣ ବିଶ୍ବକର୍ମାଙ୍କୁ ପ୍ରମାଣପତ୍ର ପ୍ରଦାନ କରିବା ସହ ମୋଦୀ ସେମାନଙ୍କ ସହ ଫଟୋ ଉଠାଇଛନ୍ତି। ଏହି ଯୋଜନା ମାଧ୍ୟମରେ କୌଳିକ ବୃତ୍ତିଗତଙ୍କୁ ବିଶ୍ୱକର୍ମା ପରିଚୟ ମିଳିବ। ଏଥିସହ ସରକାରଙ୍କ ପକ୍ଷରୁ ୫% ସୁଧରେ ୩ ଲକ୍ଷ ଟଙ୍କା ପର୍ଯ୍ୟନ୍ତ ଋଣ ଯୋଗାଇ ଦିଆଯିବ। ମୌଳିକ ଏବଂ ଉନ୍ନତ ପ୍ରଶିକ୍ଷଣ ଦିଆଯିବ। ୧୮ ବର୍ଗର କୌଳିକ ବୃତ୍ତିଧାରୀ ଏହି ଯୋଜନା ଦ୍ବାରା ଉପକୃତ ହେବେ। ଏଥିପାଇଁ ୫ ବର୍ଷରେ ୧୩ ହଜାର କୋଟି ଖର୍ଚ୍ଚ କରିବେ କେନ୍ଦ୍ର ସରକାର।
ଯଦି ଆପଣ ପ୍ରଧାନମନ୍ତ୍ରୀ ବିଶ୍ୱକର୍ମା ଯୋଜନାରେ ସାମିଲ ହେବାକୁ ଚାହାନ୍ତି କିମ୍ବା ଏ ବିଷୟରେ ଜାଣିବାକୁ ଚାହାନ୍ତି, ତେବେ ଯୋଜନାର ଅଫିସିଆଲ୍ ୱେବସାଇଟ୍ pmvishwakarma.gov.inକୁ ଯାଇ ସବିଶେଷ ତଥ୍ୟ ପାଇପାରିବେ।
Comments are closed.