ପିପିଲିରେ ମୋ ବସ୍‌‌କୁ ଅଟକାଇଲେ ଆନ୍ଦୋଳନକାରୀ

ପିପିଲି: ୧୦ ଦଫା ଦାବି ନେଇ ଡ୍ରାଇଭର ମହାମଞ୍ଚ ପକ୍ଷରୁ ବୁଧବାରଠାରୁ ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ ରାଜ୍ୟବ୍ୟାପୀ ଚାଲିଥିବା ଷ୍ଟିଅରିଂ ଛାଡ ଆନ୍ଦୋଳନର ଦ୍ୱିତୀୟ ଦିନରେ ପିପିଲିଠାରେ ମୋ ବସ୍‌‌କୁ ୩ଘଣ୍ଟା କାଳ ଅଟକାଇଥିଲେ ଆନ୍ଦୋଳନରତ ଡ୍ରାଇଭର। ତେବେ ଆନ୍ଦୋଳନ ସମୟରେ ରୋଗୀବୁହା ଯାନ, ସ୍କୁଲ ଓ କଲେଜ ଗାଡି, କ୍ଷୀର ଓ ଖାଦ୍ୟ ନେଇ ଯାଉଥିବା ଯାନ, ପରୀକ୍ଷାର୍ଥୀଙ୍କୁ ନେଇ ଯାଉଥିବା ଗାଡ଼ି ସମେତ ପର୍ଯ୍ୟଟକଙ୍କ ଗାଡ଼ିଗୁଡ଼ିକର ଯାତାୟତରେ କୌଣସି ପ୍ରତିବନ୍ଧକ ନଥିଲା।

ଭୁବନେଶ୍ୱରରୁ ପୁରୀ, ପିପିଲି ଓ କୋଣାର୍କ ଅଞ୍ଚଳକୁ ଯାଉଥିବା ମୋ ବସ୍‌ଗୁଡିକୁ ଗୁରୁବାର ସକାଳେ ପିପିଲି ଟୋଲ୍‌‌ ଗେଟ୍‌‌ ନିକଟରେ ଓଡ଼ିଶା ଡ୍ରାଇଭର ମହାସଂଘର କର୍ମକର୍ତ୍ତାମାନେ ଅଟକାଇବା ସହ ଗାଡ଼ିକୁ ଆଗକୁ ଯିବାକୁ ଦେଇନଥିଲେ। ପିପିଲି ଆଇଆଇସି ଅଭିମନ୍ୟୁ ନାୟକ ଆନ୍ଦୋଳନକାରୀଙ୍କୁ ବୁଝାସୁଝା କରିବା ପରେ ପୂର୍ବାହ୍ନ ୧୦ଟାରେ ମୋ ବସ୍‌‌କୁ ସେମାନେ ଯିବାକୁ ଦେଇଥିଲେ। ତେବେ ଏହା ପରଠାରୁ ଏହି ରୁଟ୍‌‌ରେ କୌଣସି ମୋ ବସ୍‌‌ ଚଳାଚଳ କରିନଥିବା ସୂଚନା ମିଳିଛି। କେତେକ ଯାତ୍ରୀବାହୀ ଅଟୋରିକ୍ସାକୁ ସେଠାରେ ଅଟକା ଯିବାକୁ ନେଇ କିଛି ସମୟ ପାଇଁ ବିବାଦୀୟ ପରିସ୍ଥିତି ଉପୁଜିଥିବା ବେଳେ ଅଲ୍‌‌ ଓଡ଼ିଶା ମିଳିତ ଅଟୋ ମହାସଂଘର ପୁରୀ ଜିଲା ସଭାପତି ପ୍ରଫୁଲ୍ଲ ପ୍ରଧାନ ସେଠାରେ ପହଞ୍ଚି ଡ୍ରାଇଭର ମହାସଂଘର କର୍ମକର୍ତ୍ତାଙ୍କ ସହ ଆଲୋଚନା କରିବା ପରେ ଅଟୋରିକ୍ସାଗୁଡ଼ିକ ସ୍ୱାଭାବିକ ଭାବେ ଚଳାଚଳ କରିଥିଲା। ଡ୍ରାଇଭର ମହାସଂଘର ପୁରୀ ଜିଲାର ଉପସଭାପତି ଗୋପାଳ ଚନ୍ଦ୍ର ବାରିକ, ସଂପାଦକ କୁଲେନ ପାଟ୍ଟସାହାଣୀ, ପିପିଲି ବ୍ଲକ ସଭାପତି ଲକ୍ଷ୍ମୀଧର ବେହେରା, ଉପସଭାପତି ପ୍ରଦୀପ ସ୍ୱାଇଁ, ସଂପାଦକ ରଞ୍ଜନ ପ୍ରଧାନ ପ୍ରମୁଖଙ୍କ ନେତୃତ୍ୱରେ ମହାସଂଘର ୩ଶହରୁ ଊର୍ଦ୍ଧ୍ବ ସଦସ୍ୟ ତଥା ଡ୍ରାଇଭରମାନେ ପିପିଲିରେ ଆନ୍ଦୋଳନ ଚଳାଇଛନ୍ତି।

Comments are closed.