ଫୁଲବାଣୀ : ବିଜେପିର ଜାତୀୟ ମୁଖପାତ୍ର ସଂବିତ୍ ପାତ୍ରଙ୍କ ବିରୋଧରେ କଂଗ୍ରେସ ପକ୍ଷରୁ ଆଜି ଏତଲା ଦିଆଯାଇଛି। ଏତଲାରେ ଦର୍ଶା ଯାଇଛି ଯେ, ଏକ ଘରୋଇ ଟିଭି ଚ୍ୟାନେଲର ଏକ ବିତର୍କରେ କଂଗ୍ରେସର ମୁଖପାତ୍ର ରାଜୀବ ତ୍ୟାଗୀ, ସଂବିତ୍ ପାତ୍ର ଓ ଅନ୍ୟ ୩ ଜଣ ଅଂଶଗ୍ରହଣ କରିଥିଲେ। ବିତର୍କ ବେଳେ ସଂବିତ୍ ପାତ୍ର ରାଜୀବ ତ୍ୟାଗୀଙ୍କୁ ଆକ୍ଷେପ ମୁଳକ ଟିପ୍ପଣି କରିଥିଲେ। ଯାହା ଫଳରେ ରାଜୀବଙ୍କୁ ମାନସିକ ଭାବେ ଆଘାତ ଲାଗିଥିଲା ଓ ହାର୍ଟ ଆଟାକ୍ ହୋଇଥିଲା ଏବଂ ଶେଷରେ ମୃତ୍ୟୁ ହୋଇ ଯାଇଥିଲା। ତେଣୁ ରାଜୀବଙ୍କ ମୃତ୍ୟୁ ପାଇଁ ସଂବିତ୍ ପାତ୍ର ଦାୟୀ ବୋଲି କଂଗ୍ରେସ ଅଭିଯୋଗ କରିବା ସହ ତାଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ କଂଗ୍ରେସ ଅନୁରୋଧ କରିଛି। ଜିଲ୍ଲା କଂଗ୍ରେସର ସୋସିଆଲ ମିଡିଆ ସଂଯୋଜକ ତଥା ଯୁବନେତା ବସନ୍ତ କୁମାର ପାଢିଙ୍କ ନେତୃତ୍ୱରେ କଂଗ୍ରେସ ନେତା ହେମନ୍ତ କୁମାର କର, ଘନ କୁମାର ଶବର , ଶସାଂର ଭୋଇ , ରବିନ୍ଦ୍ର ସଡ଼ଙ୍ଗୀ , ଦୁର୍ଯ୍ୟୋାଧନ ପଟନାୟକ, ସଂଜୟ ଭଂଜ, ସୂର୍ଯ୍ୟକାନ୍ତ ଦାସ , ଶିବ ଶଙ୍କର ବେହେରା, ବଳଦେବ ବେହେରା, ପ୍ରେମଚନ୍ଦା ତ୍ରିପାଠୀ, ଭିକାରି ଚରଣ ପାଣିଗ୍ରାହୀ ଅନ୍ୟମାନେ ଏଥିରେ ସାମିଲ୍ ହୋଇ ଟାଉନ ଥାନାରେ ଏତଲା ଦେଇଛନ୍ତି।
Comments are closed.