ପିପିଲି/ବଳଙ୍ଗା: ବଳଙ୍ଗା ବଜାର ଉପକଣ୍ଠରେ ଥିବା ଏକ ପେଟ୍ରୋଲ ପମ୍ପର ପରିଚାଳକଙ୍କୁ ଆକ୍ରମଣ କରି ୭୦ହଜାର ଟଙ୍କା ଲୁଟି ନେଇଥିବା ୩ଜଣ ଅଭିଯୁକ୍ତଙ୍କୁ ବଳଙ୍ଗା ପୁଲିସ ଗିରଫ କରିଛି। ସେମାନଙ୍କଠାରୁ ନଗଦ ୮୧୫୦ ଟଙ୍କା, ବାଇକ, ୪ଟି ମୋବାଇଲ୍, ଗୋଟିଏ ପିସ୍ତଲ, ଗୋଟିଏ ଖେଳଣା ବନ୍ଧୁକ ଓ ଏକ ଖଣ୍ଡାକୁ ପୁଲିସ ଜବତ କରିଛି ବୋଲି ପିପିଲି ଏସ୍ଡିପିଓ ଦେବଦତ୍ତ ବରାଳ ଶୁକ୍ରବାର ଏକ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି।
ସୂଚନା ଅନୁଯାୟୀ, ୨୫ ତାରିଖ ସନ୍ଧ୍ୟା ସାଢ଼େ ୮ଟାବେଳେ ବଳଙ୍ଗା ବଜାର ନିକଟରେ ଥିବା ସୟଦ ଆଲମ ଅଲ୍ଲୀଙ୍କ ସାଗର ଫିଲିଙ୍ଗ ଷ୍ଟେସନ ନାମକ ପେଟ୍ରୋଲ ପମ୍ପରୁ ଏହି ଲୁଟ୍ ହୋଇଥିଲା। ୩ ଦୁର୍ବୃତ୍ତ ଏକ ବାଇକ୍ରେ ଆସି ପରିଚାଳକ ଏସ୍କେ ଆଲ୍ଲାଉଦ୍ଦିନଙ୍କୁ ଆକ୍ରମଣ କରିବା ସହିତ କ୍ୟାସ୍ବାକ୍ସରେ ଥିବା ୭୦ ହଜାର ଟଙ୍କା, ୨ଟି ମୋବାଇଲ୍କୁ ଲୁଟି ନେଇଥିଲେ। ଯିବାବେଳେ ସେମାନେ ଆତଙ୍କ ସୃଷ୍ଟି କରିବାସହ ଅଣଓଡ଼ିଆ ଯୁବକ ରମେଶ କୁମାରଙ୍କୁ ଖଣ୍ଡାରେ ହାଣି ଫେରାର୍ ହୋଇଯାଇଥିଲେ। ଏସ୍ପି ଡ. ଉମାଶଙ୍କର ଦାଶଙ୍କ ନିର୍ଦେଶ ଓ ପିପିଲି ଏସ୍ଡିପିଓ ଦେବଦତ୍ତ ବରାଳଙ୍କ ତତ୍ତ୍ୱାବଧାନରେ ବଳଙ୍ଗା ଥାନାଧିକାରୀ ଏସ୍ଆଇ ସୁଶାନ୍ତ କୁମାର ସାହୁ ଏକ ସ୍ୱତନ୍ତ୍ର ଟିମ୍ର ନେତୃତ୍ବ ନେଇ ବିଭିନ୍ନ ସ୍ଥାନରେ ଚଢ଼ଉ କରି ସମ୍ପୃକ୍ତ ଅପରାଧୀଙ୍କୁ ଧରିଥିଲେ। ଅଭିଯୁକ୍ତଙ୍କ ମଧ୍ୟରୁ ଜଣକ ଘର ଭୁବନେଶ୍ୱର ଲିଙ୍ଗରାଜ ଥାନା ଅଞ୍ଚଳରେ ହୋଇଥିବାବେଳେ ଅନ୍ୟ ଦୁଇଜଣଙ୍କ ଘର ସତ୍ୟବାଦୀ ଥାନା ଅଞ୍ଚଳରେ ବୋଲି ପୁଲିସ କହିଛି। ଗିରଫ ୩ ଲୁଟିଆଙ୍କୁ ନିମାପଡ଼ା କୋର୍ଟକୁ ଚାଲାଣ କରାଯାଇଛି।
