ରାଷ୍ଟ୍ରପତି ନିର୍ବାଚନ, ସହମତି ଭିତ୍ତିରେ ପ୍ରାର୍ଥୀ ଦେବେ ମିଳିତ ବିରୋଧୀ ମଞ୍ଚ

ପ୍ରାର୍ଥୀ ହେବାକୁ ଅରାଜି ଶରତ ପାୱାର

ଡେସ୍କ: ଆଜି ନୂଆଦିଲ୍ଲୀରେ ଏକ ବୈଠକରେ ମିଳିତ ହୋଇଥିବା ବିରୋଧୀଦଳର ନେତାମାନେ ଜୁଲାଇ ୧୮ରେ ହେବାକୁ ଥିବା ରାଷ୍ଟ୍ରପତି ନିର୍ବାଚନ ପାଇଁ ସହମତି ଭିତ୍ତିରେ ପ୍ରାର୍ଥୀ ଦେବାକୁ ନିଷ୍ପତ୍ତି ନେଇଛନ୍ତି। ବୈଠକ ପରେ ତୃଣମୂଳ କଂଗ୍ରେସ ନେତ୍ରୀ ମମତା ବାନାର୍ଜୀ କହିଛନ୍ତି, ଆଜିର ବୈଠକରେ ଅନେକ ଦଳ ଯୋଗ ଦେଇଥିଲେ। ଆମେ ନିଷ୍ପତ୍ତି ନେଇଛୁ ଯେ ଆମେ କେବଳ ସହମତିରେ ଜଣେ ପ୍ରାର୍ଥୀ ବାଛିବୁ। ସମସ୍ତେ ଏହି ପ୍ରାର୍ଥୀଙ୍କୁ ସମର୍ଥନ ଦେବେ। ଆମେ ଏ ନେଇ ଅନ୍ୟମାନଙ୍କ ସହ ପରାମର୍ଶ କରିବୁ।

ସୁଧୀନ୍ଦ୍ର କୁଲକର୍ଣ୍ଣି କହିଛନ୍ତି ଯେ ଆସନ୍ତା ରାଷ୍ଟ୍ରପତି ନିର୍ବାଚନରେ ସହମତି ଭିତ୍ତିରେ ଜଣେ ସାଧାରଣ ପ୍ରାର୍ଥୀ ଦେବା ପାଇଁ ବିରୋଧୀଦଳର ନେତାମାନେ ସଂକଳ୍ପ ଗ୍ରହଣ କରିଛନ୍ତି। ଏଭଳି ଜଣେ ପ୍ରାର୍ଥୀ ଚୟନ କରାଯିବ ଯିଏ ପ୍ରକୃତରେ ସମ୍ବିଧାନର ରକ୍ଷକ ଭାବରେ କାର୍ଯ୍ୟ କରିପାରିବ ଏବଂ ଆମ ଗଣତନ୍ତ୍ର ଉପରେ ମୋଦୀ ସରକାର ଯେଭଳି ଅଧିକ କ୍ଷତି ପହଞ୍ଚାଇ ପାରିବେ ନାହିଁ, ସେ କ୍ଷେତ୍ରରେ କାର୍ଯ୍ୟ କରିବେ। ଏହି ବୈଠକରେ ଅରବିନ୍ଦ କେଜ୍ରିୱାଲଙ୍କ ନେତୃତ୍ୱାଧୀନ ଆମ୍ ଆଦମୀ ପାର୍ଟି ଭାଗ ନେଇ ନ ଥିଲା।

ଏହି ବୈଠକରେ ଅଂଶଗ୍ରହଣ କରିଥିବା ସିପିଆଇ ସାଂସଦ ବିନୟ ବିଶ୍ୱମ କହିଛନ୍ତି ଯେ ମମତା ବାନାର୍ଜୀ ବିରୋଧୀ ଦଳର ରାଷ୍ଟ୍ରପତି ପ୍ରାର୍ଥୀ ଭାବରେ ଏନସିପିର ଶରଦ ପାୱାରଙ୍କ ନାମ ପ୍ରସ୍ତାବ ଦେଇଥିଲେ କିନ୍ତୁ ପାୱାର ସେହି ପ୍ରସ୍ତାବକୁ ଗ୍ରହଣ କରିନଥିଲେ। ୧୭ଟି ରାଜନୈତିକ ଦଳର ନେତାମାନେ ରାଷ୍ଟ୍ରପତି ନିର୍ବାଚନରେ ​​ଏନଡିଏ ବିରୋଧରେ ମିଳିତ ପ୍ରାର୍ଥୀ ଦେବା ଉପରେ ସହମତି ପ୍ରକାଶ କରିବା ପାଇଁ ମମତା ବାନାର୍ଜୀଙ୍କ ଦ୍ୱାରା ଆହୂତ ବିରୋଧୀ ଦଳର ଏକ ଗୁରୁତ୍ୱପୂର୍ଣ୍ଣ ବୈଠକରେ ଯୋଗ ଦେଇଥିଲେ।

ବୈଠକରେ ଟିଏମସି, କଂଗ୍ରେସ, ସିପିଆଇ, ସିପିଆଇ (ଏମ), ସିପିଆଇଏମଏଲ, ଆରଏସପି, ଶିବସେନା, ଏନସିପି, ଆରଜେଡି, ଏସପି, ନେସନାଲ କନ୍ଫରେନ୍ସ, ପିଡିପି, ଜେଡି (ଏସ), ଡିଏମକେ, ଆରଏଲଡି, ଆଇୟୁଏମଏଲ ଏବଂ ଜେଏମଏମ ଯୋଗ ଦେଇଥିଲେ। ଏହି ବୈଠକକୁ ତେଲେଙ୍ଗାନା ମୁଖ୍ୟମନ୍ତ୍ରୀ କେ ଚନ୍ଦ୍ରଶେଖର ରାଓଙ୍କ ନେତୃତ୍ୱାଧୀନ ତେଲେଙ୍ଗାନା ରାଷ୍ଟ୍ର ସମିତି ପ୍ରତିନିଧି ପଠାଇ ନାହାଁନ୍ତି। ରାଷ୍ଟ୍ରପତି ନିର୍ବାଚନ ଜୁଲାଇ ୧୮ରେ ଅନୁଷ୍ଠିତ ହେବ ଏବଂ ଜୁଲାଇ ୨୧ରେ ଭୋଟ୍ ଗଣାଯିବ।