ସମ୍ବଲପୁର: ସ୍ଥାନୀୟ ବରେଇପାଲି ଥାନାଞ୍ଚଳରେ ବେଆଇନ ଭାବରେ ବାଣ ବିକ୍ରି କରିବା ଅଭିଯୋଗରେ ପୁଲିସ ଜଣକୁ ଗିରଫ କରିଛି। ପୁଲିସର ସୂଚନାନୁଯାୟୀ, ବେଆଇନ ବାଣ ବିକ୍ରି ସୂଚନା ମିଳିବା ପରେ ବରେଇପାଲି ଡେଙ୍ଗସର୍ଗି ରାସ୍ତା ଅଞ୍ଚଳରେ ଚଢ଼ାଉ କରାଯାଇଥିଲା। ଚଢ଼ାଉ ସମୟରେ ବିଭିନ୍ନ ପ୍ରକାରର ବାଣ ଗୁଡିକ ଜବତ କରାଯାଇଥିଲା। ଏଣୁ ବରେଇପାଲି ଥାନାରେ ଏକ ମାମଲା ରୁଜୁ କରାଯାଇ ବାଣ ରଖିଥିବା ପି.ସି. ସାହୁ ଏ ସମ୍ପର୍କିତ କୌଣସି କାଗଜପତ୍ର ଦେଖା ନ ପାରିବାରୁ ଗିରଫ କରାଯିବା ପରେ ନୋଟିସ ଦିଆଯାଇ ଛାଡି ଦିଆଯାଇଛି। ଜବତ ହୋଇଥିବା ବାଣ ଗୁଡିକର ଆନୁମାନିକ ମୂଲ୍ୟ ୧ ଲକ୍ଷ ଟଙ୍କାରୁ ଊର୍ଦ୍ଧ୍ବ ହେବ। ଆଗାମୀ ଦିନରେ ଦୀପାବଳି ଆସୁଥିବା ବେଳେ ସମ୍ବଲପୁର ପୁଲିସ ପକ୍ଷରୁ ବେଆଇନ ବାଣ ବିକ୍ରି ଉପରେ କଡା ନଜର ରଖାଯାଇଥିବା ବେଳେ ବରେଇପାଲି ଅଞ୍ଚଳରେ ପ୍ରଥମ ଚଢ଼ାଉ କରାଯାଇ ଏତେ ପରିମାଣରେ ବାଣ ଜବତ କରାଯାଇଛି ବୋଲି ଏସଡିପିଓ ତୁଫାନ ବାଗ କହିଛନ୍ତି।
ଏସଡିପିଓ ଶ୍ରୀ ବାଗ ଆହୁରୀ କହିଛନ୍ତି ଯେ, ଗତକାଲି ବରେଇପାଲି ଅଞ୍ଚଳରେ ଚଢ଼ାଉ କରାଯାଇଥିବା ବେଳେ ଆଜି କ୍ଷେତରାଜପୁର ଥାନା ଅନ୍ତର୍ଗତ ମୁଙ୍ଗାପଡ଼ା ଅଞ୍ଚଳରେ ଚଢ଼ାଉ କରାଯାଇଥିଲା। ମୁଙ୍ଗାପଡ଼ା ଠାରେ ବିନୁ ଜାଗିଙ୍କ ସ୍ଥାନରେ ଚଢ଼ାଉ ସମୟରେ ପ୍ରାୟ ୧ ଲକ୍ଷ ୨୦ ହଜାର ଟଙ୍କାର ବାଣ ବେଆଇନ ଭାବରେ ରଖାଯାଇଥିବାର ମିଳିଥିଲା। ଏଣୁ ଏକ ମାମଲା ରୁଜୁ କରି ଗିରଫ ହୋଇଥିବା ବ୍ୟକ୍ତିଙ୍କୁ ନୋଟିସ ଦିଆଯାଇ ଛଡାଯାଇଛି। ବେଆଇନ ବାଣ ବିକ୍ରି ଉପରେ ଆଗାମୀ ଦିନରେ ଆହୁରୀ ଚଢ଼ାଉ ଅଭିଯାନ କରାଯିବ ବୋଲି ଏସଡିପିଓ ଶ୍ରୀ ବାଗ କହିଛନ୍ତି।
