ନୂଆଦିଲ୍ଲୀ : ଯୌନ ଶୋଷଣ ଅଭିଯୋଗ ଆସିବା ପରେ କଂଗ୍ରେସର ଜାତୀୟ ଛାତ୍ର ସଂଗଠନ (ଏନ୍ଏସ୍ୟୁଆଇ) ସଭାପତି ଫିରୋଜ ଖାନ ମଙ୍ଗଳବାର ନିଜ ପଦରୁ ଇସ୍ତଫା ଦେଇଛନ୍ତି। କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀ ତାଙ୍କ ଇସ୍ତଫାକୁ ଗ୍ରହଣ କରିଛନ୍ତି।
ଇସ୍ତଫା ଦେବା ପୂର୍ବରୁ ଜାମ୍ମୁ କାଶ୍ମୀର ନିବାସୀ ଫିରୋଜ ଖାନ କହିଥିଲେ ଯେ ଦଳର ହିତକୁ ଧ୍ୟାନରେ ରଖି ସେ ନିଜ ପଦରୁ ଇସ୍ତଫା ଦେଉଛନ୍ତି। ସେ ନିଜ ଇସ୍ତଫା ପତ୍ରରେ ଲେଖିଛନ୍ତି ଯେ ତାଙ୍କ ବିରୋଧରେ ଆସିଥିବା ଅଭିଯୋଗ ଦଳର ଛବିକୁ ମଳିନ କରୁଛି। ଏଥିପାଇଁ ସେ ନିଜ ପଦରୁ ଇସ୍ତଫା ଦେଉଛନ୍ତି। ଏହାସହ ନିଜ ବିରୋଧରେ ଆସିଥିବା ଅଭିଯୋଗକୁ ସେ ଖଣ୍ଡନ କରିଛନ୍ତି।
ଉଲ୍ଲେଖଯୋଗ୍ୟ ଯେ ଫିରୋଜ ଖାନଙ୍କ ବିରୋଧରେ ତାଙ୍କ ସଂଗଠନର ଜଣେ ମହିଳା ସଦସ୍ୟ ଯୌନ ନିର୍ଯାତନା ଅଭିଯୋଗ ଆଣିଛନ୍ତି। କଂଗ୍ରେସ ପକ୍ଷରୁ ତିନି ଜଣିଆ ଏକ କମିଟି ଗଠନ କରି ମାମଲାର ତଦନ୍ତ ପାଇଁ ନିର୍ଦେଶ ଦିଆଯାଇଛି। ମହିଳା ଜଣକ ପ୍ରଥମେ ଜୁନ ମାସରେ ଏହି ଅଭିଯୋଗ କରିଥିଲେ। ମହିଳା ଜଣକ ନିଜ ଅଭିଯୋଗରେ ଦର୍ଶାଇଛନ୍ତି ଯେ ଫିରୋଜ ତାଙ୍କ ଭଉଣୀ ସହ ଦଳର ଅନ୍ୟ କିଛି ମହିଳାଙ୍କୁ ଯୌନ ଶୋଷଣ କରିଛନ୍ତି। କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀ ଏବଂ ଦଳର ଅନ୍ୟ ବରିଷ୍ଠ ନେତାଙ୍କୁ ଭେଟି ସେ ଏ ବିଷୟରେ ଜଣାଇଛନ୍ତି। ଏନେଇ ମହିଳା ଜଣକ ଦିଲ୍ଲୀ ସଂସଦ ମାର୍ଗସ୍ଥିତ ଥାନାରେ ଏତଲା ଦେଇଛନ୍ତି।
