ନବରଙ୍ଗପୁର : ଭୁବନେଶ୍ୱର ଠାରେ ଚାଲିଥିବା ରାଜ୍ୟ ଆଥଲେଟିକ ମିଟରେ ନବରଙ୍ଗପୁର ଜିଲ୍ଲା ଆଥଲେଟିକ ଦଳର ମହେନ୍ଦ୍ର ସାନ୍ତା ୧୦୦ ମିଟର ଦୌଡ଼ ପ୍ରତିଯୋଗିତାରେ ସ୍ବର୍ଣ୍ଣ ପଦକ ହାସଲ କରିଛନ୍ତି । ସେ ୧୦.୭୫ ସେକେଣ୍ଡରେ ଦୂରତା ଅତିକ୍ରମ କରି ପ୍ରତିଯୋଗିତାରେ ସ୍ବର୍ଣ୍ଣ ପଦକ ହାସଲ କରିବା ସହ ଟୁର୍ଣ୍ଣାମେଣ୍ଟରେ ରେକର୍ଡ କରି ଜିଲ୍ଲା ପାଇଁ ଗୌରବ ଆଣିଛନ୍ତି । ନବରଙ୍ଗପୁର କ୍ରୀଡ଼ା ସଙ୍ଘର ସାଧାରଣ ସମ୍ପାଦକ ପ୍ରହଲ୍ଲାଦ ତ୍ରିପାଠୀ, ଉପସଭାପତି ଏମ. ବାଳକୃଷ୍ଣ ରାଓ, ସହ ସମ୍ପାଦକ ମନୋଜ କୁମାର ପଟ୍ଟନାୟକ ଏବଂ ଜିଲ୍ଲା କ୍ରୀଡା ଅଧିକାରୀ ମହେନ୍ଦ୍ର ସାହୁ ପ୍ରମୁଖ ଏଥିରେ ଖୁସି ବ୍ୟକ୍ତ କରିଛନ୍ତି।
ସୂଚନା ଯୋଗ୍ୟ ଯେ ୮ତାରିଖରୁ ୧୧ତାରିଖ ପର୍ୟ୍ୟନ୍ତ ଭୁବନେଶ୍ୱର ସ୍ଥିତ କିଟ୍ ଆଥଲେଟିକ ଷ୍ଟାଡିୟମରେ ୬୮ ତମ ରାଜ୍ୟ ଆଥଲେଟିକ୍ ମିଟ ଚାଲିଛି । ଦ୍ଵିତୀୟ ଦିନ ସୁଦ୍ଧା ନବରଙ୍ଗପୁର ଜିଲ୍ଲା ଦଳ ମୋଟ ଦୁଇଟି ସ୍ବର୍ଣ୍ଣ, ଗୋଟିଏ ରୋପ୍ୟ ଓ ଦୁଇଟି ବ୍ରୋଞ୍ଜ ପଦକ ହାସଲ କରିଛନ୍ତି। ଦଳର ଏହି ସଫଳତା ପାଇଁ ଜିଲ୍ଲାପାଳ ତଥା କ୍ରୀଡ଼ା ସଙ୍ଘର ସଭାପତି ଡ଼ଃ. କମଳ ଲୋଚନ ମିଶ୍ର ଏବଂ ଜିଲ୍ଲାର ପ୍ରାକ୍ତନ ଖେଳାଳିମାନେ ଆଗାମୀ ଦିନରେ ଜିଲ୍ଲା ପାଇଁ ଆହୁରି ପଦକ ଆସିବ ବୋଲି ଆଶା ବ୍ୟକ୍ତ କରିବା ସହ ଶୁଭେଛା ଜଣାଇଛନ୍ତି ।
Comments are closed.