ନିଶା ହିଁ ହିଂସାର ସୂତ୍ରଧର

ଫୁଲନଖରା: ସ୍ୱେଚ୍ଛାସେବୀ ସଂଗଠନ ମା’ ଘର ଫାଉଣ୍ଡେସନ ପକ୍ଷରୁ ରାଜ୍ୟରେ ନିଶା ନିବାରଣ ନିମନ୍ତେ ଅଭିଯାନ ଆରମ୍ଭ ହୋଇଛି। ଏହି କ୍ରମରେ୨୬ ତାରିଖରୁ ବାଲେଶ୍ୱର ଜିଲା ଶାନ୍ତି କାନନରୁ ମହିଳା ଅଭିଯାତ୍ରୀ ଦଳ ବାହାରି ସୋମବାର କଟକ ସଦର ଥାନା ଅନ୍ତର୍ଗତ ବାଲିକୁଦାରେ ପହଞ୍ଚିଛନ୍ତି। ଫାଉଣ୍ଡେସନର ରାଜ୍ୟ ଅଧ୍ୟକ୍ଷା ଋତୁପର୍ଣ୍ଣା ମହାନ୍ତିଙ୍କ ନେତୃତ୍ୱରେ ଆରମ୍ଭ ହୋଇଥିବା ଏହି ସଚେତନତା କାର୍ଯ୍ୟକ୍ରମ ଅବସରରେ ଏକ ସଭା ଅନିଲ ବେଉରାଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଥିଲା। ମଦ୍ୟ ପାନ ଯୋଗୁଁ ରାଜ୍ୟରେ ନାରୀ ନିର୍ଯାତନା ସହିତ ଅପରାଧିକ କାର୍ଯ୍ୟ, ଦୁର୍ନୀତି, ଦୁର୍ଘଟଣା ଓ ହିଂସା ଆଦି ସଂଘଠିତ ହେଉଛି ବୋଲି ସଭାରେ ମତ ପ୍ରକାଶ ପାଇଥିଲା।
କେବଳ କଟକ-ଭୁବନେଶ୍ୱର ଦ୍ୱୈତନଗରୀରେ ୪୨ ପ୍ରତିଶତ ଛାତ୍ର ନିଶା କବଳରେ ପଡ଼ିଥିବାରୁ ସଭାରେ ଉଦ୍‍ବେଗ ପ୍ରକାଶ ପାଇଥିଲା। ସମାଜସେବୀ ସୋନୁ ନାୟକଙ୍କ ତତ୍ତ୍ୱାବଧାନରେ ଆୟୋଜିତ ଏହି ସଭାରେ ବିଷ୍ଣୁପ୍ରିୟା ଚାନ୍ଦ, ସନ୍ଦୀପ ବେଉରା, ରବୀନ୍ଦ୍ର ନାୟକ, ରମାକାନ୍ତ ବେହେରା, ପ୍ରକାଶ ପାଣି ପ୍ରମୁଖ ଯୋଗଦେଇଥିଲେ। ଏହି ଅବସରରେ ବାଲିକୁଦା ନାଗରିକ କମିଟି ପକ୍ଷରୁ ଅଭିଯାତ୍ରୀ ଦଳକୁ ସ୍ୱାଗତ କରାଯାଇଥିଲା। ଜନସାଧାରଣଙ୍କୁ ମାଦକ ଦ୍ରବ୍ୟ ବ୍ୟବହାର ନ କରିବାକୁ ଶପଥ ପାଠ କରାଯାଇଥିଲା। ଏହି ଅଭିଯାତ୍ରୀ ଦଳ ଆସନ୍ତାକାଲି ଭୁବନେଶ୍ୱରରେ ପହଞ୍ଚି ରାଜ୍ୟପାଳ ଓ ମୁଖ୍ୟନ୍ତ୍ରୀଙ୍କୁ ଦାବିପତ୍ର ପ୍ରଦାନ କରିବେ ବୋଲି ଜଣାଯାଇଛି। ଏହି ଦଳରେ ରାଜ୍ୟର ବିଭିନ୍ନ ଜିଲାର ଶତାଧିକ ମହିଳା ସ୍ୱେଚ୍ଛାସେବୀ ସାମିଲ ହୋଇଛନ୍ତି।