ଆଇଜର ଶିକ୍ଷାନୁଷ୍ଠାନ ହଷ୍ଟେଲରେ ଛାତ୍ରଙ୍କ ଆତ୍ମହତ୍ୟା

ଗୋପାଳପୁର: ଗୋଳନ୍ଥରା ଥାନା ଅନ୍ତର୍ଗତ ଲଉଡିଗାଁ ଠାରେ ଥିବା ଆଇଜର ସ୍ଥାୟୀ କ୍ୟାମ୍ପସ ପରିସରରେ ଥିବା ବାଳକ ହଷ୍ଟେଲରେ ଜଣେ ପ୍ରଥମ ବର୍ଷ ଛାତ୍ର ଫ୍ୟାନ ହୁକରେ ଗାମୁଛା ଲଗାଇ ଆତ୍ମହତ୍ୟା କରିଥିବା ଅଭିଯୋଗ ହୋଇଛି। ମୃତ ଛାତ୍ର ଜଣଙ୍କ ବାଲେଶ୍ଵର ଜିଲ୍ଲା ଅନ୍ତର୍ଗତ ବାଲେଶ୍ଵର ସଦର ଥାନା ଅଧୀନସ୍ଥ ଡୁମା ଡିହିର ସୌମ୍ୟ ସତ୍ୟ ମକର ମୁର୍ମୁ (୧୮) ବୋଲି ପୁଲିସ ସୂଚନା ଦେଇଛି। ଅଭିଯୋଗ ଅନୁଯାୟୀ ଆଜି ସକାଳ ସାଢେ଼ ୧୧ଟା ବେଳେ ଆଇଜର ପକ୍ଷରୁ ଫୋନ‌ ଯୋଗେ ଗୋଳନ୍ଥରା ଥାନାକୁ ପ୍ରଥମ ବର୍ଷ ଛାତ୍ର ସୌମ୍ୟ ହଷ୍ଟେଲ ରୁମ ପରିସରରେ ଆତ୍ମହତ୍ୟା କରିଥିବା ସୂଚନା ଦିଆଯାଇଥିଲା। ଅଭିଯୋଗ ପରେ ପୁଲିସ ଘଟଣାସ୍ଥଳରେ ପହଞ୍ଚି ଦେଖିବା ସମୟରେ ବାଳକ ହଷ୍ଟେଲର ୭ମ ମହଲାର ୭୨୪ ନଂ ରୁମରେ ସୌମ୍ୟ କୋଠାରୀର ଫ୍ୟାନରେ ଏକ ଗାମୁଛା ସାହାଯ୍ୟରେ ଝୁଲି ଥିବା ଦେଖିବାକୁ ପାଇଥିଲେ। ଆଇଜର କର୍ତ୍ତୁପକ୍ଷଙ୍କ ଉପସ୍ଥିତିରେ ସୌମ୍ୟଙ୍କ ଶରୀରକୁ ଉଦ୍ଧାର କରାଯାଇ ବ୍ରହ୍ମପୁର ବଡ ମେଡିକାଲ ନେଇଥିଲେ। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିବା ପୁଲିସ ସୂଚନା ଦେଇଛନ୍ତି। ଅନ୍ୟ ପଟେ ମୃତ ସୌମ୍ୟ ଗତ ୨୦ ଦିନ ହେଲା ଅନୁଷ୍ଠାନକୁ ଆସିଥିବା ବେଳେ ହଷ୍ଟେଲରେ ରହି ଆସୁଥିଲେ। କିପରି ଓ‌ କାହିଁକି ସୌମ୍ୟ ଆତ୍ମହତ୍ୟା କଲେ ତାହାକୁ ନେଇ ପୁଲିସ ତଦନ୍ତ କରୁଥିବା ସହ କୋଠରୀ ପରିସରରୁ ଛାତ୍ରଙ୍କ ମୋବାଇଲ ଜବତ କରିଛି।