ଫୁଲବାଣୀ: କନ୍ଧମାଳ ଜିଲ୍ଲା ମୁଖ୍ୟ ଚିକିତ୍ସାଳୟରେ ଚିକିତ୍ସାରେ ଅବହେଳାରୁ ଜଣେ ଗର୍ଭବତୀ ମହିଳାଙ୍କ ପ୍ରସବ ବେଳେ ନବଜାତ ଶିଶୁର ମୃତ୍ୟୁ ହୋଇଥିବା ଅଭିଯୋଗ ହୋଇଛି। ଏ ନେଇ ପ୍ରସୂତୀଙ୍କ ସ୍ବାମୀ ଟାଉନ ଥାନାରେ ଏତଲା ଦେଇଛନ୍ତି।
ସୂଚନା ଅନୁଯାୟୀ, ଗତ ରବିବାର ଫିରିଙ୍ଗିଆର ଅନୀଲ ବେହେରାଙ୍କ ସ୍ତ୍ରୀଙ୍କ ପ୍ରସବ ବେଦନା ହେବା ଯୋଗୁଁ ତାଙ୍କୁ ଫିରିଙ୍ଗିଆ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଥିଲା। ସେଠାରେ ପ୍ରସବରେ ଜଟିଳତା ଦେଖା ଦେବାରୁ ଗର୍ଭବତୀଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଥିଲା। ତେବେ ରାତି ସାରା ତାଙ୍କୁ କୌଣସି ଚିକିତ୍ସା ମିଳି ନ ଥିବା ପରିବାର ଲୋକେ ଅଭିଯୋଗ ଆଣିଛନ୍ତି।
ଅଭିଯୋଗ ଅନୁସାରେ, ସୋମବାର ଦିନବେଳେ ଗୋଟିଏ ଇଞ୍ଜେକସନ୍ ଦେବାପରେ ପ୍ରସବ ବେଦନା ବଢିଥିଲା। କିନ୍ତୁ ଦିନ ଦୁଇଟା ସମୟରେ ତାଙ୍କୁ ବ୍ରହ୍ମପୁର ସ୍ଥାନାନ୍ତରିତ କରିବା ପାଇଁ କହିଥିଲେ ଦାୟିତ୍ୱରେ ଥିବା ଡାକ୍ତର। ଅନିଲଙ୍କୁ କିଛି ଔଷଧ ଆଣିବା ପାଇଁ କହି ସ୍ତ୍ରୀଙ୍କୁ ପ୍ରସୂତୀ ଗୃହକୁ ନେବାକୁ ପରାମର୍ଶ ଦିଆଯାଇ ଥିଲା। ତେବେ ପ୍ରସୂତୀ ଗୃହକୁ ନେବା ବେଳେ ଏକ ଶିଶୁ ଜନ୍ମ ହୋଇ ତଳେ ପଡିଯିବାରୁ ତାର ମୃତ୍ୟୁ ହୋଇଥିବା ଅଭିଯୋଗ କରିଛନ୍ତି ଅନୀଲ। କାର୍ଯ୍ୟରତ ଡାକ୍ତର ଓ ନର୍ସଙ୍କ ଅବହେଳା ଯୋଗୁଁ ନବଜାତଟିର ମୃତ୍ୟୁ ହୋଇଥିବା ପରିବାର ଲୋକେ ଅଭିଯୋଗ ଆଣିଛନ୍ତି। ଏ ନେଇ ଫୁଲବାଣୀ ଟାଉନ୍ ଥାନାରେ ଏକ ଲିଖିତ ଅଭିଯୋଗ କରି ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରିଛନ୍ତି ଅନୀଲ। ଅପରପକ୍ଷେ, ଘଟଣାକୁ ଗୁରୁତ୍ୱର ସହ ନେଇ ତଦନ୍ତ ନିର୍ଦ୍ଦେଶ ଦେଇଛନ୍ତ ଜିଲା ମୁଖ୍ୟ ଚିକିତ୍ସା ଅଧିକାରୀ ଡ. ସନ୍ତୋଷ କୁମାର ପାଢ଼ୀ। ଯେ କେହି ଦୋଷୀ ସାବ୍ୟସ୍ତ ହେବ, ତାକୁ ନିଶ୍ଚିନ୍ତ ଦଣ୍ଡ ମିଳିବ କହିଛନ୍ତି ସିଡିଏମଓ।
Comments are closed.